سمت بھارگو
راجوری//پیر پنچال کے پہاڑی علاقوں میں شدید بارشوں نے معمولاتِ زندگی کو بری طرح متاثر کیا ہے۔ جموں راجوری پونچھ نیشنل ہائی وے منگل کی صبح لینڈ سلائیڈنگ کی وجہ سے کئی گھنٹوں تک بند رہی، جس سے سینکڑوں گاڑیاں دونوں اطراف پھنس کر رہ گئیں۔موسمیات محکمہ کی پیشگوئی کے مطابق بارش کا آغاز پیر اور منگل کی درمیانی رات تقریباً ایک بجے ہوا، جبکہ صبح چار بجے کے بعد بارش کی شدت میں مزید اضافہ دیکھنے کو ملا۔ یہ تیز بارش صبح دس بجے تک جاری رہی، جس کے بعد سہ پہر تک درمیانے درجے کی بارش کا سلسلہ جاری رہا۔منگل کی صبح تقریباً ساڑھے سات بجے کلائی کے مقام پر زبردست لینڈ سلائیڈنگ نے جموں راجوری پونچھ قومی شاہراہ کو بند کر دیا۔ اس کے نتیجے میں شاہراہ کے دونوں اطراف سینکڑوں گاڑیاں ٹریفک میں پھنس گئیں۔بارڈر روڈز آرگنائزیشن کی جانب سے فوری طور پر صفائی اور بحالی کا کام شروع کیا گیا، جو تقریباً تین گھنٹے تک جاری رہا۔ بعد ازاں شاہراہ پر ٹریفک کو جزوی طور پر بحال کر دیا گیا۔صرف قومی شاہراہ ہی نہیں، بلکہ کئی دیگر دیہی و رابطہ سڑکیں بھی شدید متاثر ہوئیں۔ ان میں کیری خواص روڈ، کوٹلی روڈ، دھیری ریلیوٹ روڈ، نمبلان کیری روڈ سمیت درجنوں دیہی سڑکیں شامل ہیں، جن پر یا تو لینڈ سلائیڈنگ ہوئی یا پھسلن کی وجہ سے گاڑیوں کی آمدورفت ناممکن ہو گئی۔شدید بارش کے باعث ندی نالوں اور دریائوں میں طغیانی آ گئی ہے، جس سے پانی کی سطح میں زبردست اضافہ ہوا ہے۔ ضلعی انتظامیہ نے لوگوں کو خبردار کیا ہے کہ وہ پانی کے ذخائر اور زمین کھسکنے والے علاقوں کے قریب جانے سے گریز کریں۔اس کے ساتھ ہی احتیاطی تدابیر کے طور پر راجوری، پونچھ اور ریاسی اضلاع کے تمام سرکاری و نجی اسکولوں کو منگل کے روز بند رکھنے کا فیصلہ کیا گیا۔ اسکول ایجوکیشن ڈیپارٹمنٹ نے متعلقہ ضلعی انتظامیہ کی ہدایت پر یہ حکم نامہ جاری کیا۔ضلعی انتظامیہ کے حکام نے بتایا کہ بارشوں کے دوران گھروں اور دیگر تعمیرات کو نقصان پہنچنے کی اطلاعات موصول ہو رہی ہیں، تاہم نقصانات کی مکمل تفصیل آئندہ ایک یا دو دن میں فیلڈ اسیسمنٹ کے بعد واضح ہو پائے گی۔ایک اعلیٰ افسر نے بتایاکہ ’’ابھی تک کی اطلاعات کے مطابق درجنوں کچے مکانات اور مویشیوں کے باڑے منہدم ہو چکے ہیں، لیکن فیلڈ اسٹاف کی رپورٹ آنے کے بعد ہی حتمی نقصان کا اندازہ لگایا جا سکے گا‘۔مقامی لوگ انتظامیہ سے مطالبہ کر رہے ہیں کہ وہ ایسے حالات میں فوری امدادی کارروائیاں تیز کرے اور متاثرہ افراد کو فوری ریلیف فراہم کیا جائے۔ ساتھ ہی یہ بھی کہا جا رہا ہے کہ بارش کے سیزن سے قبل خطرناک مقامات کی شناخت کر کے مناسب حفاظتی اقدامات کئے جائیں تاکہ انسانی جانوں اور املاک کو محفوظ بنایا جا سکے۔
پونچھ میں تمام سکول آج بھی بند رہیں گے:محکمہ
عظمیٰ نیوز سروس
پونچھ//پونچھ ضلع میں شدید موسم اور مسلسل بارش کے پیش نظر محکمہ تعلیم نے بدھ 23 جولائی 2025 کو بھی تمام سرکاری و نجی اسکولوں کو بند رکھنے کا حکم دیا ہے۔چیف ایجوکیشن آفیسر پونچھ کی جانب سے جاری ایک سرکاری نوٹیفکیشن میں کہا گیا ہے کہ ’تمام سرکاری و نجی اسکولوں کو موسم کی خرابی کے باعث بدھ، 23 جولائی 2025 کو بند رکھا جائے گا‘۔واضح رہے کہ منگل کو بھی خراب موسم اور تیز بارشوں کے باعث احتیاطی تدابیر کے طور پر اسکول بند رکھے گئے تھے۔ مسلسل بارشوں کے باعث ندی نالوں میں طغیانی، زمین کھسکنے (لینڈ سلائیڈنگ) اور سڑکوں پر پھسلن جیسے خطرات کے پیش نظر یہ فیصلہ کیا گیا ہے۔محکمہ تعلیم کے مطابق طلباء کی حفاظت اولین ترجیح ہے، اور موجودہ موسمی حالات کو مدنظر رکھتے ہوئے مزید ایک دن کے لیے تدریسی سرگرمیاں معطل کی گئی ہیں۔والدین اور طلباء سے گزارش کی گئی ہے کہ وہ تازہ ترین اطلاعات کے لئے مقامی انتظامیہ اور اسکول حکام سے رابطے میں رہیں۔پونچھ کے علاوہ دیگر متاثرہ اضلاع میں بھی اسکولوں کی بندش کے حوالے سے فیصلے متوقع ہیں، جن کا انحصار آنے والے موسم پر ہوگا۔
