عظمیٰ نیوز سروس
سرینگر//محکمہ موسمیات نے وادی کشمیر میں اگلے تین دنوں کے دوران رک رک کر ہلکی سے درمیانی درجے کی بارشوں کے ساتھ تیز ہوائیں چلنے کی پیش گوئی کی ہے ۔انہوں نے کہا کہ اس دوران جموں وکشمیر میں کہیں کہیں تیز اور شدید بارشیں بھی ہوسکتی ہیں۔محکمے نے اپنی ایڈوائزری میں کہا ہے کہ کمزور مقامات پر سیلابی ریلے ، لینڈ سلائیڈنگ اور پتھر کھسکنے کے بھی امکانات ہیں۔محکمے نے اپنی ایڈوائزری میں کہا ہے کہ جموں وکشمیر میں 21 سے 24 جولائی تک کہیں کہیں تیز بارشوں کے ساتھ تیز ہوائیں اور کئی مقامات پر ہلکی سے درمیانی درجے کی بارشیں ہوسکتی ہیں۔ انہوں نے کہا کہ 23 اور 24 جولائی کو بھی موسم عام طور پر ابر آلود رہنے کے ساتھ موسم کی یہی صورتحال جاری رہ سکتی ہے ۔ان کا کہنا ہے کہ بعد ازاں 25 سے 27 جولائی تک موسم گرم اور مرطوب رہ سکتا ہے جبکہ اس دوران کہیں کہیں ہلکی بوندا باندی ہوسکتی ہے ۔ایڈوائزری کے مطابق اس دوران دریائوں اور ندی نالوں میں پانی کی سطح بڑھ سکتی ہے اور نشیبی علاقوں میں کہیں کہیں پانی جمع ہوسکتا ہے ۔کسانوں سے کہا گیا ہے کہ وہ 21 سے 24 جولائی تک کاشتکاری سے متعلق سرگرمیاں معطل رکھیں۔
کئی اضلاع کیلئے ریڈ الرٹ
جیسا کہ توقع کی گئی ہے، گزشتہ 12 گھنٹوں سے جموں ڈویژن میں شدید بارش ریکارڈ کی گئی ، اب موسمی نظام شام تک کشمیر میں داخل ہو ا جس کے نتیجے میں جموں و کشمیر میں بڑے پیمانے پر بارش متوقع ہے۔شہر سرینگر اور وادی کے کئی علاقوں میں شام ساڑھے سات بجے سے موسلا دھار بارش کا ایک مرحلہ گذر گیا۔موسمیات کے مطابق، 22 اور 23 جولائی کو جموں و کشمیر کے زیادہ تر مقامات پر موسلادھار سے بہت زیادہ بارش ہو سکتی ہے لیکن مسلسل بارش کی توقع نہیں ہے۔ جموں ڈویژن، جنوبی کشمیر اور وسطی اور شمالی کشمیر کے کچھ حصوں میں شدت کی سرگرمیاں متوقع ہیں۔کولگام، اننت ناگ، شوپیان، اور سری نگر سٹی سمیت جموں و کشمیر کے کئی مقامات پر ریڈ الرٹ متوقع ہے کیونکہ ان علاقوں میں بہت زیادہ بارش سے سیلاب آسکتا ہے۔جموں و کشمیر میں 24 جولائی تک مجموعی طور پر وقفے وقفے سے بارش کا امکان ہے۔
