عظمیٰ نیوز سروس
پلوامہ// جموں و کشمیر انٹرپرینیورشپ ڈیولپمنٹ انسٹی ٹیوٹ (جے کے ای ڈی آئی)نے جمعہ کوشیر کشمیر یونیورسٹی آف ایگریکلچرل سائنسز اینڈ ٹیکنالوجی (SKUAST-K)کے طلبا کے لیے ایک روزہ انٹرپرینیورشپ اورینٹیشن پروگرام کا انعقاد کیا۔پروگرام کا بنیادی مقصد طلبا میں کاروباری ارادے کو فروغ دینا تھا اور اس کے ساتھ ساتھ خواہشمند کاروباری افراد کیلئے دستیاب وسیع مواقع اور ادارہ جاتی معاونت کے طریقہ کار کے بارے میں آگاہی فراہم کرنا تھا۔اورینٹیشن سیشن نے طلبا کو اس اہم کردار کے بارے میں تعلیم دینے پر زور دیا جو جدید کیرئیر کی تشکیل میں انٹرپرینیورشپ اور جدت طرازی ادا کرتے ہیں۔ شرکا کی حوصلہ افزائی کی گئی کہ وہ کاروبار کو نہ صرف ایک قابل عمل کیریئر کے راستے کے طور پر دیکھیں بلکہ اقتصادی ترقی اور سماجی تبدیلی میں حصہ ڈالنے کے ایک ذریعہ کے طور پر بھی دیکھیں۔تقریباً 83طلبا نے اورینٹیشن پروگرام میں حصہ لیا جنہوں نے فیکلٹی کے ساتھ بات چیت کی اور انہیں جموں و کشمیر میں ابھرتے ہوئے انٹرپرینیورشپ کلچر کے ساتھ ساتھ بزنس پلان ماڈلنگ، تفصیلی پروجیکٹ رپورٹ (DPR)کی تشکیل، صلاحیت کی تعمیر اور مالیاتی اور مارکیٹ ربط فراہم کرنے کے بارے میں بتایا گیا جس میں خواہشمند کاروباریوں کو ہینڈ ہولڈنگ اور مینٹرشپ سپورٹ شامل ہے۔ طلبا کو جے اینڈ کے اسٹارٹ اپ پالیسی 2024-27 کے بارے میں بھی آگاہ کیا گیا۔بات چیت کا ایک اہم مرکز طلبا کی حوصلہ افزائی کرنا تھا کہ وہ ایک قابل عمل کیریئر کے آپشن کے طور پر انٹرپرینیورشپ کو تلاش کریں۔
