عظمیٰ نیوز سروس
جموں// جموں خطہ کے اندرونی علاقوں اور سرحدوں کے ساتھ ساتھ سیکورٹی کی صورتحال پرامن اور قابو میں ہے۔ سیکورٹی فورسز نے سخت چوکسی برقرار رکھی ہوئی ہے اور علاقے میں سرگرم 40 سے 50 ملی ٹینٹوں کا سراغ لگانے کے مقصد سے آپریشن کے ایک مرحلہ وار طریقے سے اہم علاقوں کے بالائی حصوں پر غلبہ حاصل کیا گیاہے۔ سرکاری ذرائع نے بتایا کہ ملی ٹینٹوں کوے تعاقب میں متعدد سطحی اقدامات، بشمول ڈرون حکمت عملی، اضافی تعیناتی اور شبانہ تیز کارروائیوں پر توجہ مرکوز کی گئی ہے۔ذرائع کے مطابق اس وقت پیر پنجال رینج کے جنوب میں 40 سے 50 کے قریب ملی ٹینٹ متعدد گروپوں میں سرگرم ہیں۔ “ان میں سے تقریبا 80 فیصد پاکستانی شہری ہیں،” ۔انہوں نے کہا کہ راجوری، پونچھ، کشتواڑ، ڈوڈا اور ادھم پور سمیت اضلاع میں انسداد ملی ٹینسی کی کارروائیوں کا سلسلہ جاری ہے۔ جاری کارروائیوں سے واقف ذرائع نے بتایا کہ “ہم ملی ٹینٹوں کی نقل و حرکت کے حوالے سے مخصوص معلومات پر کارروائی کر رہے ہیں، ان کا سراغ لگایا جا رہا ہے اور وہ ابھی فرار ہیں۔”یہ کارروائیاں کشتواڑ، بسنت گڑھ، راجوری اور پونچھ کے اندرونی علاقوں پر مرکوز ہیں، جہاں زمینی سطح کی انٹیلی جنس فوج کی نقل و حرکت کو مدد دینے میں اہم کردار ادا کرتی ہے۔سیکورٹی کو نمایاں طور پر بڑھا دیا گیا ہے، انتہائی حساس علاقوں اور خطے میں اونچی رسائی کے ساتھ کمک تعینات کی گئی ہے۔ ذرائع نے بتایا “علاقے کے بلند و بالا علاقوں کو فورسز کے موثر کنٹرول میں لایا گیا ہے اور ان پر مکمل تسلط قائم کیا جا رہا ہے۔ نائٹ ویژن ڈیوائسز اور دیگر جدید آلات کا استعمال کرتے ہوئے رات کی نگرانی کو تیز کر دیا گیا ہے”۔وادی کشمیر میں داخل ہونے کے لیے ملی ٹینٹوں کے ذریعے استعمال کیے گئے راستوں کو بند کر دیا گیا ہے اور دراندازی کی کوششوں کو روکنے کے لیے حفاظتی اقدامات کیے گئے ہیں۔ ذرائع نے بتایا “سرحد پار سے سرگرمیاں جاری ہیں اور رپورٹوں سے پتہ چلتا ہے کہ ملی ٹینٹوں کو سرحد پر کھڑا کیا جا رہا ہے” ۔انسداد ملی ٹینسی کی حکمت عملی میں رات کی کارروائیوں اور حکمت عملیوں پر زیادہ زور دینے کے ساتھ نظر ثانی کی گئی ہے جس کا مقصدملی ٹینٹوں کو دوبارہ منظم ہونے یا پناہ حاصل کرنے اور پہاڑی سلسلوں میں رات کی نقل و حرکت کرنے کا موقع فراہم نہ کرنا ہے۔ذرائع نے کشتواڑ کے چھاترو علاقے میں ایک حالیہ تصادم کا بھی حوالہ دیا، جہاں ایک ملی ٹینٹ گروپ کو پہلے سے ہی ایک اسٹریٹجک پہاڑی علاقے پر غلبہ حاصل کرنے والے فوجی اہلکاروں نے پکڑ لیا تھا۔ ملی ٹینٹوں نے جوابی کارروائی کرتے ہوئے فوجیوں پر گرینیڈ پھینکا، جس سے اس بات کی تصدیق ہوتی ہے کہ اونچائی والی پٹیوں میں کام کرنے میں ان کی سرگرمی اب سخت نگرانی میں ہے۔ذرائع نے بتایا کہ ” انہیں نقل و حرکت کرنا مشکل ہو رہا ہے۔”جموں خطے کے کئی پہاڑی اضلاع میں گزشتہ تین سالوں کے دوران درجنوں حملے، آپریشن اور انکانٹر دیکھنے میں آئے ہیں جن کے نتیجے میں فوجیوں کو جانی نقصان پہنچا ہے۔
