یو این آئی
سرینگر// ڈائریکٹر جنرل پولیس نلین پربھات نے بدھ کو انسپکٹر جنرل پولیس کشمیر کے ہمراہ شمالی کشمیر کے مختلف اضلاع کا دورہ کرتے ہوئے سکیورٹی صورتحال کا جائزہ لیا۔اس موقع پر انہوں نے ایس ایس پیز کے ساتھ اہم اجلاس کی صدارت کی اور خصوصی آپریشن گروپ اہلکاروں و دیگر فورسز کے ساتھ زمینی سطح پر تبادلہ خیال بھی کیا۔ڈی جی پی نے سرحدی و حساس اضلاع میں تعینات سکیورٹی فورسز کی پیشہ ورانہ لگن، چوکسی اور جرات مندی کو سراہتے ہوئے کہا کہ ان کی قربانیوں اور انتھک کوششوں کی بدولت وادی میں امن و استحکام کا ماحول قائم ہے۔انہوں نے جوانوں سے خطاب کرتے ہوئے کہا’’آپ کی خدمات اور قربانیاں قوم کیلئے باعث فخر ہیں۔ موجودہ حالات میں آپ کی ذمہ داریاں مزید اہم ہو چکی ہیں اور ہم سب کو متحد ہو کر ریاست میں دیرپا امن یقینی بنانا ہے‘‘۔ڈی جی پی نے اجلاس کے دوران موجودہ سکیورٹی چیلنجز، انسداد دہشت گردی آپریشنز، مقامی تعاون اور خفیہ اطلاعات کی بنیاد پر کارروائیوں پر تفصیلی تبادلہ خیال کیا۔ انہوں نے فورسز کو ہدایت دی کہ وہ عوام سے قریبی رابطہ برقرار رکھتے ہوئے اعتماد سازی کو مزید فروغ دیں۔دورے کے دوران انہوں نے مختلف مقامات پر انسداد دہشت گردی مشقوں، چیک پوائنٹس، اور حساس علاقوں کی سیکیورٹی انتظامات کا جائزہ لیا، اور موقع پر موجود افسران سے تفصیلات حاصل کیں۔
