عظمیٰ نیوز سروس
سرینگر//لیفٹیننٹ گورنر منوج سنہا ،وزیراعلیٰ عمر عبداللہ اور نیشنل کانفرنس کے صدر ڈاکٹر فاروق عبداللہ نے یوم عاشورہ کے موقع پر حضرت امام حسین ؓ کی قربانیوں کویاد کیا۔لیفٹیننٹ گورنر نے اپنے پیغام میں کہا’’حضرت امام حسین ؓ اور ان کے رفقا کی کربلا میں دی گئی قربانیاںاور عدل و اِنصاف اور انسانی وقارکے آفاقی اصولوں سے ان کی ثابت قدمی انسانیت کو آج بھی اتحاد، سماجی ہم آہنگی اور راست روی کے اقدار اپنانے کی تحریک دیتی ہیں۔اس موقع پر آئیے ہم حضرت حسین ؓ کے ابدی اصولوں کو اَپنی زندگی کا حصہ بنائیں اور ایک منصفانہ و مساوات پر مبنی معاشرے کی تشکیل کے لئے خود کو وقف کریں‘‘۔ادھر وزیر اعلیٰ عمر عبداللہ نے شہدائے کربلا کو خراجِ عقیدت پیش کرتے ہوئے ان کی بے مثال قربانی کو جرأت، استقامت اور آزمائشوں کے مقابل ڈٹ جانے کا ایک لازوال مینارِ نور قرار دیا۔وزیر اعلیٰ نے اَپنے پیغام میں کہا کہ کربلا کا سانحہ صرف ایک تاریخی واقعہ نہیں بلکہ پوری انسانیت کے لئے ایک اخلاقی درس ہے۔ انہوں نے کہا کہ حضرت حسین نے سچائی، وقار اور انصاف کے اعلیٰ اصولوں کا علم بلند رکھا اور ظلم کے سامنے جھکنے کے بجائے شہادت کو ترجیح دی۔انہوں نے کہا’’کربلا میں حضرت حسین ؓکی استقامت ہمیں باطل کے خلاف ڈٹے رہنے اور انسانی وقار کے تحفظ کی ترغیب دیتی ہے، چاہے حالات کتنے ہی کٹھن کیوں نہ ہوں۔ ان کا پیغام فرقوں، علاقوں اور زمانوں کی قید سے بالاتر ہے۔‘‘عمر عبداللہ نے مزید کہا کہ حضرت حسین ؓ کی قربانی، صبر اور صداقت کے جو اصول کربلا میں نمایاں ہوئے، وہ آج کے دور میں مزید اہمیت اختیار کر چکے ہیں، جب دنیا کو اخلاقی و سماجی چیلنجوں کا سامنا ہے۔انہوں نے لوگوں پر زور دیاکہ وہ واقعہ کربلا کے پیغام پر غور کریں اور انصاف، مساوات اور پرامن بقائے باہمی کے اصولوں کے ساتھ اَپنے عزم کی تجدید کریں۔ وزیر اعلیٰ نے عاشورہ کی مناسبت سے عزاداری میں شریک تمام افراد سے اظہارِ یکجہتی کرتے ہوئے انتظامیہ کو ہدایت دی کہ وہ جموں و کشمیر بھر میں محرم الحرام کی تقریبات کے پُرامن اور باوقار انعقاد کو یقینی بنائیں۔انہوں نے جموںوکشمیر کے لوگوں کی سلامتی، امن اور خوشحالی کے لئے دعا بھی کی۔اس دوران نیشنل کانفرنس صدر ڈاکٹر فاروق عبد اللہ نے یوم عاشورہ پر اپنے پیغام میں کہا کہ میدان کربلا میں سیدنا حضرت امام حسین ؓ اور ان کے جانثار ساتھیوں کی شہادت کو فقید المثال قربانی قرار دیتے ہوئے کہا کہ دنیا میں جب بھی اور جہاں کہیں بھی ظلم ہوگا تو بے سروسامان مظلوم انسان امام عالی مقام ؓ کی عظیم شہادت کے فلسفے کو سامنے رکھ کر باطل کو عبرت ناک شکست سے دو چارکرنے میں کامیاب ہوں گے ۔فاروق عبداللہ نے کہا کہ یزیدی لشکر نے اگرچہ میدان کربلا کو حسینی ؓخون پاک سے لالہ زار کر دیا تھا لیکن آج بھی عالمی انسانیت حق و صداقت کے علمبردار حسین ؓ اور ان کے جانثاروں کی قربانیوں پر فخر کررہی ہے اور یہ سلسلہ تاقیامت اسی طرح جاری رہے گا۔ انہوں نے دنیا کی قوتوں سے کہا ہے کہ وہ تاریخ عالم کے منفردواقعہ کربلا سے سبق سیکھ کر مظلوم افراد اور اقوام کو پامال کرنے کی ضد سے باز آئیں۔
