عظمیٰ نیوز سروس
سرینگر//جموں و کشمیر کی وزیر تعلیم سکینہ ایتو نے بدھ کے روز اسکولوں میں جاری موسم گرما کی تعطیلات میں فوری توسیع کو مسترد کرتے ہوئے کہا کہ طلبہ کیلئے15 دن کی چھٹی کافی ہے۔انہوں نے اس بات پر زور دیا کہ موسم گرما کی تعطیلات کے بعد سکولوں کو دوبارہ کھولنا ہماری ترجیح ہے اور مزید کوئی بھی فیصلہ موسمی حالات کے جائزے پر سختی سے منحصر ہوگا۔انہوں نے آرام اور تعلیمی ذمہ داری کے درمیان توازن قائم کرنے کی اہمیت پر زور دیا۔انہوںنے کہا’’ ہمیں یہ سمجھنا چاہیے کہ ہمارے بچوں کو اپنا نصاب مکمل کرنے کی ضرورت ہے‘‘۔انہوںنے مزیدکہا’’ہم ہر بار جب گرم موسم ہو تو اسکول بند نہیں رکھ سکتے۔ تعلیم کو نقصان نہیں پہنچنا چاہئے۔حکومت نے اس سے قبل کشمیر صوبے کے تمام سرکاری اور نجی سکولوں میں گرمی کی شدید لہر کے بعد 23 جون سے7 جولائی تک موسم گرما کی تعطیلات کا اعلان کیا تھا جس کی وجہ سے طلبہ کے لیے کلاسوں میں جانا مشکل ہوگیا تھا۔تعطیلات کا اعلان کرنے سے پہلے، حکام نے بڑھتے ہوئے درجہ حرارت کی وجہ سے اسکولوں کے اوقات پر نظر ثانی کی تھی۔وزیرتعلیم نے کہا کہ اگرچہ حکومت طلباء کی فلاح و بہبود کے لیے حساس ہے، تعطیلات کو ایک معقول مدت سے آگے بڑھانے سے تعلیمی کیلنڈر متاثر ہوتا ہے۔ انہوںنے کہاکہ7 جولائی کے بعد موسم کا جائزہ لیا جائے گا اور اگر بالکل ضروری ہوا تو مزید کارروائی ہوگی۔
