لیفٹیننٹ گورنر کا بالتل دورہ ، یاتری نواس پانتہ چھوک کا افتتاح
بنیادی سہولیات کی 24گھنٹے دستیابی کو یقینی بنانے کی ہدایت
سرینگر// سالانہ امر ناتھ یاترا3 جولائی کو شروع ہونے جارہی ہے اوریہ 9 اگست کو رکھشا بندھن کے موقع پر اختتام پذیر ہوگی۔یاترا کا دورانیہ گزشتہ سال 52 دنوں کے مقابلے اس سال کم کر کے 38 دن کر دیا گیا ہے۔جموں یاتری نواس میں یاتریوں کے قافلے آنا شروع ہوگئے ہیں جہاں یاتریوں کی قیام کیلئے ایک ساتھ 50ہزار افراد کی گنجائش رکھی گئی ہے۔جموں میں یاتریوں کا کہنا ہے کہ حکومت نے ایک دن کیلئے 2000 ٹوکن کے محدود کوٹا رکھا ہے۔انہوں نے کہاکہ پیر کو بڑی تعداد میں لوگ آئے، اور صرف 2000 ٹوکن جاری ہوئے۔تین رجسٹریشن مراکز وشنوی دھام، پنچایت بھون اور مہاجن ہال جموں میں منگل سے آف لائن رجسٹریشن کے لیے کام کرنا شروع کر دیں گے۔ سب ڈویژنل مجسٹریٹ منو ہنسا نے کہا کہ صرف شرائن بورڈ کے ذریعہ جاری کردہ ٹوکن رکھنے والے یاتریوں کو رجسٹریشن مراکز پر رکھا جائے گا۔ادھرلیفٹیننٹ گورنر منوج سنہا نے تین روز قبل کہا تھا کہ پہلگام واقعہ کے بعد امسال یاتریوں کی رجسٹریشن میں 10فیصد سے زیادہ کی کمی ہوئی ہے۔لیفٹیننٹ گورنر نے پیر کے روز بالتل بیس کیمپ کا دورہ کیا اور 3 جولائی کو شروع ہونے والی شری امرناتھ سالانہ یاترا سے قبل تیاریوں کا جائزہ لیا۔بال تل میں، لیفٹیننٹ گورنر نے کیمپ کے عہدیداروں سے بات چیت کی اور صحت کی دیکھ بھال، بجلی، مواصلات، پانی کی فراہمی، صفائی، خوراک، رہائش، موسم کی پیش گوئی، ٹریفک کے انتظام، نگرانی اور ٹریک کی دیکھ بھال، سیکورٹی گرڈ اور ہنگامی خدمات کے انتظامات کا جائزہ لیا۔لیفٹیننٹ گورنر نے عہدیداروں کو ہدایت دی کہ وہ یاتریوںکی سہولت کے لئے مناسب افرادی قوت کے ساتھ تمام بنیادی سہولیات کی چوبیس گھنٹے دستیابی کو یقینی بنائیں۔اپنے دورے کے دوران، لیفٹیننٹ گورنر نے جائے وقوع کا معائنہ کیا اور شرائن بورڈ کے ڈیزاسٹر مینجمنٹ اور یاتری نواس کمپلیکس کی پیشرفت کا جائزہ لیا۔انہوں نے بالتل بیس کیمپ ہسپتال کا بھی دورہ کیا، اور صحت کی سہولیات کا معائنہ اور طبی عملے کے لیے ایک تربیتی وارڈ کا افتتاح کیا۔یاترا کے مجموعی انتظامات میں نمایاں اپ گریڈیشن کی گئی ہے۔ شرائن بورڈ، انتظامیہ، پولیس، سیکورٹی فورسز، سروس پرووائیڈرز، تمام لائن ڈیپارٹمنٹس اور سٹیک ہولڈرز نے یاترا کو پرامن، محفوظ اور پریشانی سے پاک یقینی بنانے کے لیے یاتریوں پر مبنی اقدامات کو تندہی سے لاگو کیا ہے۔ لیفٹیننٹ گورنر نے کہا کہ اس سال امرناتھ یاترا کے لیے پچھلے سالوں کے مقابلے نمایاں طور پر بہتر انتظامات کیے گئے ہیں۔ یاترا سے قبل زمینی تیاریوں کا جائزہ لینے کے لیے گاندربل میں بالتل کے اپنے دورے کے دوران، ایل جی سنہا نے نوٹ کیا کہ شرائن بورڈ ، سول انتظامیہ، جموں و کشمیر پولیس، سیکورٹی فورسز، اور دیگر تمام سٹیک ہولڈرز نے ایک پرامن، محفوظ تجربے کو یقینی بنانے کے لیے یاتریوں پر مرکوز متعدد اقدامات نافذ کیے ہیں۔ایل جی سنہا نے ایک اعلی سطحی میٹنگ کی بھی صدارت کی جس میں مختلف محکموں کے سینئر افسران اور سیکورٹی ایجنسیوں کے اعلی حکام نے شرکت کی۔ اجلاس میں رابطہ کاری کے طریقہ کار کو حتمی شکل دینے اور سالانہ یاترا کے لیے تیاریوں کا جائزہ لینے پر توجہ مرکوز کی گئی۔جائزہ لینے کے بعد میڈیا سے بات کرتے ہوئے ایل جی نے جامع انتظامات پر اطمینان کا اظہار کیا۔ایل جی سنہا نے کہا، میں نے گزشتہ چار یاترا کا قریب سے مشاہدہ کیا ہے اور میں اعتماد سے کہہ سکتا ہوں کہ اس سال انتظامیہ کی جانب سے انتظامات اور تیاریوں کی سطح بہت بہتر ہے۔انہوں نے مختلف سیکورٹی فورسز کے درمیان ہموار تعاون کو سراہتے ہوئے اس بات پر زور دیا کہ تمام عازمین کی حفاظت کو یقینی بنانے کے لیے مضبوط اور اچھی طرح سے مربوط سیکورٹی پروٹوکول قائم کیے گئے ہیں۔انہوں نے مزید کہا کہ مجھے امید ہے کہ اس سال کی یاترا پہلے سے زیادہ ہموار اور کامیاب ہوگی اور ملک بھر سے آنے والے یاتری ایک یادگار تجربہ کے ساتھ واپس آئیں گے۔لیفٹیننٹ گورنر نے پانتہ چھو ک سرینگر میںیاتری نواس کا افتتاح بھی کیا۔یاتری نواس عطیہ کے ذریعے تعمیر کیا گیا ہے اور اس میں 1300 یاتریوں کی رہائش ہوگی۔لیفٹیننٹ گورنر نے کہا کہ یاتری نواس کے دوسرے مرحلے کی تعمیر جلد شروع ہو جائے گی۔میڈیا کے نمائندوں سے بات چیت کرتے ہوئے لیفٹیننٹ گورنر نے کہا کہ شرائن بورڈ یاتریوں کے لیے سہولیات کو بہتر بنانے کے لیے مسلسل کوششیں کر رہا ہے۔انہوں نے کہا کہ یہ یاترا جموں و کشمیر کے جذبے سے گہری جڑی ہوئی ہے اور اس کی عوام کی طرف سے مکمل حمایت اور تعاون حاصل کیا جا رہا ہے۔اس موقع پر لیفٹیننٹ گورنر نے شری امرناتھ جی یاترا پر کے کے گاندھی کی ایک پینٹنگ کی بھی نقاب کشائی کی۔یاتریوں کے لیے وقف یاتری نواس عمارت کی پانچ منزلیں کل 75 کمروں پر مشتمل ہیں جن میں 225 بستروں کی گنجائش ہے، اور 43 چھاترالی کمرے ہیں۔
