عظمیٰ نیوز سروس
جدہ // وزارت مذہبی امور نے حج 2026ء کے خواہش مند افراد کے لیے رجسٹریشن کا باضابطہ آغاز کر دیا ہے، جو ملک بھر میں مقررہ بینکوں کے ذریعے 9 جولائی تک جاری رہے گی۔سرکاری اعلامیے کے مطابق اس ابتدائی رجسٹریشن کے لیے کسی قسم کی فیس وصول نہیں کی جائے گی تاہم خواہشمند افراد کے لیے رجسٹریشن کرانا لازمی قرار دیا گیا ہے، خواہ وہ سرکاری اسکیم کے ذریعے حج کرنا چاہتے ہوں یا نجی اسکیم سے۔وزارت کے مطابق یہ رجسٹریشن نہ صرف اندرون ملک مقیم شہریوں بلکہ بیرون ملک رہائش پذیر پاکستانیوں کے لیے بھی لازم ہے۔ صرف وہ افراد حج 2026ء کے لیے اہل سمجھے جائیں گے جنہوں نے مقررہ مدت کے اندر اپنا اندراج مکمل کرایا ہو۔حج رجسٹریشن کی سہولت ملک بھر میں موجود 15 مجاز بینکوں کی شاخوں پر دستیاب ہے۔ رجسٹریشن کے بعد عازمین کو اختیار حاصل ہوگا کہ وہ سرکاری یا نجی اسکیم میں سے کسی ایک کا انتخاب کریں۔وزارت نے مزید واضح کیا ہے کہ رواں برس نجی حج اسکیم کے ذریعے سفر نہ کرپانے والے افراد کو بھی نئے سرے سے رجسٹریشن کرانا ہوگی۔ حج 2026ء کے اخراجات، پیکج کی تفصیلات اور دیگر ضوابط کا اعلان بعد ازاں حج پالیسی کے تحت کیا جائے گا۔ترجمان وزارت مذہبی امور کا کہنا تھا کہ اس رجسٹریشن کا مقصد سعودی حکومت کی ہدایت پر پاکستان سے جانے والے عازمین کا ابتدائی ڈیٹا مرتب کرنا ہے، تاکہ حج کوٹے کا تعین سعودی حکام کو پیشگی معلومات کی بنیاد پر کیا جا سکے۔
