عظمیٰ نیوز سروس
سرینگر// جموں و کشمیر کے انسداد بدعنوانی بیورو (اے سی بی)نے جمعرات کو کہا کہ محکمہ ارضیات اور کان کنی کے ایک معدنیات سپروائزر کو 15,000 روپے رشوت مانگنے اور قبول کرنے کے الزام میں گرفتار کیا گیاہے۔ایک بیان کے مطابق جموں و کشمیر اینٹی کرپشن بیورو کو ایک تحریری شکایت موصول ہوئی تھی جس میں الزام لگایا گیا تھا کہ محکمہ ارضیات اور کان کنی میں معدنیات کے نگران بشارت حبیب معمولی معدنیات (ریت)کو اٹھانے کی اجازت دینے کے لیے رشوت کا مطالبہ کر رہے ہیں۔”شکایت کی وصولی پر، ایک محتاط تصدیق کی گئی، جس سے متعلقہ سرکاری ملازم کی طرف سے رشوت کی مانگ کی تصدیق کی گئی اور اسی کے مطابق، ایک مقدمہ ایف آئی آرنمبر 11/2025 برائے انسداد بدعنوانی ایکٹ، 1988 (بطور ترمیم)تھانہ اے سی بی سرینگر میں درج کیا گیا” ۔”تحقیقات کے دوران، ایک ٹریپ ٹیم تشکیل دی گئی، ٹیم نے ایک کامیاب جال بچھا دیا اور ملزم سرکاری ملازم آزاد گواہوں کی موجودگی میں شکایت کنندہ سے 15000 روپے رشوت طلب کرتے ہوئے رنگے ہاتھوں پکڑا گیا۔ ملزم کو موقع پر ہی حراست میں لے لیا گیا۔”یہاں یہ بات قابل ذکر ہے کہ صرف دو دن قبل اسی محکمہ کے ایک اور اہلکار کو اے سی بی نے صفا پورہ کے علاقے میں 10,000 روپے کی رشوت لیتے ہوئے رنگے ہاتھوں پکڑا تھا، اس میں کہا گیا ہے کہ فوری کیس کی مزید تحقیقات جاری ہے۔
