سمت بھارگو + حسین محتشم
راجوری / پونچھ//منگل اور بدھ کی درمیانی شب جموں و کشمیر کے ضلع راجوری اور پونچھ میں شدید بارش کے نتیجے میں فلیش فلڈ کی صورتحال نے تباہی مچا دی۔ راجوری شہر کے کھیورہ بازار اور اطراف کے علاقوں میں ندی نالوں میں طغیانی آنے سے درجنوں مکانات اور دکانیں زیرِ آب آ گئیں، جب کہ پونچھ کے قاضی موھڑہ علاقے میں پانی گھروں اور مذہبی مقامات میں داخل ہو گیا، متعدد سرکاری و نجی ڈھانچوں کو نقصان پہنچا۔راجوری شہر کے مقامی باشندوں نے بتایا کہ منگل کی شب رات تقریباً 1 بجے موسلادھار بارش کا آغاز ہوا جو لگاتار صبح 4 بجے تک جاری رہی۔ اسی دوران کھیورہ نالے میں رات 2 بجے کے قریب پانی کی سطح میں خطرناک حد تک اضافہ ہوا اور دو گھنٹے سے زائد جاری فلیش فلڈ نے علاقے میں تباہی مچا دی۔کھیورہ بازار میں واقع درجنوں دکانوں میں پانی اور کیچڑ داخل ہو گیا جس سے تاجروں کو لاکھوں روپے کے نقصان کا سامنا کرنا پڑا۔ تاجروں نے بتایا کہ نالے پر موجود چھوٹے سائز کی سڑک پر بنی کلورٹ نے پانی کی روانی میں رکاوٹ ڈالی، جس کے باعث پانی بازار اور گھروں میں گھس گیا۔مقامی تاجر حق نواز چوہدری نے بتایا کہ پانی اور ملبے نے نہ صرف دکانوں کا سامان خراب کر دیا بلکہ دیواروں، فرش اور دیگر ڈھانچوں کو بھی نقصان پہنچایا۔ متاثرہ تاجروں نے ضلعی انتظامیہ سے فوری امداد اور معاوضے کا مطالبہ کیا ہے۔واقعے کے فوراً بعد اسسٹنٹ کمشنر ریونیو، جہانگیر خان اور میونسپل کونسل کے دیگر افسران موقع پر پہنچے اور متاثرہ بازار میں صفائی اور بحالی کے کام کا جائزہ لیا۔راجوری کے لوئر جواہر نگر اور تھڈی علاقوں میں بھی فلیش فلڈ کے باعث شدید نقصان ہوا۔ مقامی نالے میں طغیانی آنے سے کئی گاڑیاں بہہ گئیں جن میں سے ایک بولیرو گاڑی تقریباً 1.5 کلومیٹر دور نالے سے برآمد ہوئی، جبکہ دو گاڑیاں تاحال لاپتہ ہیں، جن کے مالکان شدید ذہنی پریشانی کا شکار ہیں۔ادھر ضلع پونچھ کے سرحدی علاقے قاضی موھڑہ (وارڈ نمبر 01) میں تیز ہواؤں اور طوفانی بارش کے باعث نالوں میں سیلابی کیفیت پیدا ہو گئی۔ مکانات کے اندر پانی اور کیچڑ داخل ہو گیا، جب کہ کئی سرکاری اور نجی املاک کو شدید نقصان پہنچا۔ست سنگ بیاس جیسی مذہبی جگہ بھی پانی کے بہاؤ کی زد میں آ گئی، جہاں نالے کی صورت اختیار کر چکے پانی نے تباہی مچا دی۔ علاقے کی مرکزی سڑک پر ایک بڑا درخت گرنے سے ایک ماروتی کار کو بھی نقصان پہنچا۔صورتحال کی سنگینی کو دیکھتے ہوئے ڈپٹی کمشنر پونچھ نے علاقے کا دورہ کیا اور نقصانات کا موقع پر جائزہ لیا۔ ان کے ہمراہ ایڈیشنل کمشنر ریونیو، تحصیلدار حویلی، ایگزیکٹو آفیسر میونسپلٹی اور دیگر افسران بھی موجود تھے۔ڈی سی نے سب سے زیادہ متاثرہ علاقوں کا معائنہ کرتے ہوئے فوری بحالی اور صاف صفائی کے احکامات جاری کئے۔ انہوں نے ای او میونسپلٹی کو ہدایت کی کہ واٹر کورس کا بغور جائزہ لیا جائے اور مستقبل میں ایسی آفات سے نمٹنے کے لئے اقدامات کئے جائیں۔تحصیلدار حویلی کو ہدایت دی گئی کہ وہ سرکاری و نجی املاک کے نقصان کا تخمینہ جلد مکمل کریں، ساتھ ہی پانی کے بہاؤ میں رکاوٹ ڈالنے والی تجاوزات کی فوری نشاندہی اور صفائی کو یقینی بنایا جائے۔قاضی موھڑہ کے مکینوںنے ڈپٹی کمشنر سے ملاقات کے دوران اپنے مسائل بیان کئے اور فوری امداد کا مطالبہ کیا۔ ڈی سی نے متاثرین کو یقین دلایا کہ بحالی کا عمل جلد شروع کیا جائے گا اور نقصانات کی تلافی کی جائے گی۔
