عظمیٰ ویب ڈیسک
سرینگر/پی ڈی پی رہنما وحید الرحمن پرہ نے سماجی رابطہ گاہ ایکس پر ایک طویل پوسٹ کرتے ہوئے عمرسرکار کو شدیدتنقید کا نشانہ بنایاـ پرہ نے کہا کہ جمہوریت میں راز داری کی کوئی گنجائش نہیں ہوتی۔ جمہوری ادارے اپنی قانونی حیثیت شفافیت اور احتساب سے حاصل کرتے ہیں، نہ کہ چھپاؤ سے۔
حکومت کے پاس ریزرویشن کی معقولیت سے متعلق ذیلی کمیٹی کی رپورٹ کو چھپانے کا نہ تو کوئی قانونی جواز ہے اور نہ ہی اخلاقی۔ اس کے برعکس، اطلاعات کے حق (RTI) ایکٹ کے تحت سرکاری اداروں پر لازم ہے کہ وہ عوامی معلومات کو از خود منظر عام پر لائیں۔ اسی اصول کے تحت، اس رپورٹ کو جموں و کشمیر کی قانون ساز اسمبلی میں پیش کیا جانا چاہیے، جو عوام کا ایوان ہے، نہ کہ کسی سیاسی جماعت کی جاگیر۔
یہ رپورٹ ہمارے نوجوانوں کی زندگیوں اور مستقبل سے تعلق رکھتی ہے، اور انہیں یہ جاننے کا مکمل حق حاصل ہے کہ ان کے مستقبل کا فیصلہ کرنے والے طاقتور لوگ ان کے نام پر کیا لکھ رہے ہیں۔
اس رپورٹ کو چھپاکر، نیشنل کانفرنس کی حکومت اپنی ذمہ داری سے راہ فرار اختیار کر رہی ہے اور جموں و کشمیر کے عوام، خصوصاً نوجوانوں کو اندھیرے میں رکھا جا رہا ہے۔ اگر یہ دانستہ گریز جاری رہا تو ہمیں مجبوراً نوجوانوں کے حقوق کے لیے پرامن جدوجہد کو جموں و کشمیر بھر کی سڑکوں تک لے جانا پڑے گاـ
