عظمیٰ ویب ڈیسک
سری نگر/حکومت جموں و کشمیر نے شری امرناتھ یاترا 2025 کے دوران مختلف راستوں اور مقامات پر 58 (جے کے اے ایس) افسران کو بطور کیمپ ڈائریکٹر اور ایڈیشنل کیمپ ڈائریکٹر تعینات کر دیا ہے۔یہ افسران یاترا کے دوران اہم خدمات انجام دیں گے، جن میں یاتریوں کی سہولیات، طبی امداد، سکیورٹی، ٹرانسپورٹ، اور دیگر بنیادی ضروریات کا انتظام شامل ہے۔
سرکاری ذرائع کے مطابق، ان افسران کو مختلف مقامات پر تعینات کیا جائے گا تاکہ یاترا کے دوران ہر مقام پر مؤثر انتظام کو یقینی بنایا جا سکے اور کسی بھی ہنگامی صورتحال میں فوری کارروائی ممکن ہو۔
یہ کیمپ ڈائریکٹرز یاتریوں کو سہولتیں فراہم کرنے، ان کی شکایات دور کرنے، اور ان کی حفاظت یقینی بنانے میں کلیدی کردار ادا کریں گے۔ انہیں یہ ذمہ داری دی گئی ہے کہ وہ تمام اسٹیک ہولڈرز جیسے پولیس، میڈیکل ٹیمیں، مقامی انتظامیہ اور والنٹیئرز کے ساتھ قریبی رابطہ رکھیں۔
واضح رہے کہ سالانہ شری امرناتھ یاترا 3 جولائی 2025 سے شروع ہو رہی ہے، جو 38 دنوں تک جاری رہے گی۔ایل جی انتظامیہ کی جانب سے یاتریوں کی سہولت اور تحفظ کے لیے اعلیٰ انتظامی، سیکورٹی اور لاجسٹک انتظامات کیے جا رہے ہیں تاکہ ملک بھر سے آنے والے ہزاروں یاتریوں کو کسی قسم کی دقت کا سامنا نہ کرنا پڑے۔
امرناتھ یاترا 58: ’جے کے اے ایس‘ افسران بطور کیمپ ڈائریکٹرز و ایڈیشنل ڈائریکٹرز تعینات
