عظمیٰ نیوز سروس
سرینگر // وزیر اعلیٰ عمر عبداللہ نے منگل کو انڈین ایسوسی ایشن آف ٹور آپریٹرز کے ایک وفد سے بات چیت کی اور مرکز کے زیر انتظام علاقے میں سیاحت کو فروغ دینے کے اقدامات پر تبادلہ خیال کیا۔وزیر اعلیٰ نے اس موقعہ پر کہا،’’ہم آئی اے ٹی او کی موجودگی یقین دِلاتی ہے کہ ہم صحیح راستے پر ہیں۔‘‘اُنہوں نے اِس سال کے شروع میں پیش آئے دہشتگردی کے المناک واقعے کا ذِکر کرتے ہوئے کہا،’’اسے بدقسمتی کہنا ایک چھوٹی سی بات ہوگی۔ یہ صرف 26 کنبوں پر ہی نہیں بلکہ بہت سے لوگوں کے اعتماد پر بھی اثرانداز ہوا۔ جب سیزن امید افزا نظر آ رہا تھا‘‘۔وزیر اعلیٰ نے سیاحتی شعبے کی بحالی پر اُمید کا اِظہار کرتے ہوئے کہا،’’2022 کے سیزن سے سیاحوں کی آمد میں نمایاں اِضافہ دیکھا گیا۔ سرینگر کی رونق، چھتوں پر سامان لئے ٹیکسیاں پہلگام، گلمرگ اور دیگر مقامات کی طرف جاتے ہوئے دیکھ کر حوصلہ ملا۔‘‘اُنہوں نے کہا ،’’ہمارا مقصد یہ نہیں کہ سیاح صرف ایک بار آئیںبلکہ بار بار آئیں،اِس کے لئے آپ کی آرا ضروری ہے تاکہ تجربے کو بہتر بنایا جا سکے، بنیادی ڈھانچے کو ترقی دی جا سکے اور مہم جوسیاحت کو فروغ دیا جا سکے۔‘‘وزیر اعلیٰ نے کہاکہ جموں و کشمیر میں نو نئے سیاحتی مقامات کی ترقی پر کام جاری ہے اور اِس سلسلے میں مرکزی حکومت کے ساتھ قریبی اِشتراک کیا جا رہا ہے۔ اُنہوں نے بنیادی ڈھانچے اور کنکٹویٹی کے بارے میں کشمیر کے لئے نئی ٹرین سروس کی مقبولیت کا ذکر کیا اور وزارتِ ریلوے سے صلاح مشورہ کر کے ٹرین کی تعداد اور لمبائی میں اضافے کا وعدہ کیا۔وزیر اعلیٰ نے ان مقامات کو دوبارہ کھولنے کی اہمیت پر زور دیا جو سانحے کے بعد عارضی طور پر بند کئے گئے تھے۔اُنہو ں نے کہا،’’یہ عمل شروع ہو چکا ہے۔ یہ صرف سیاحوں کے لئے نہیںبلکہ ہمارے اپنے اعتماد کی بحالی کا بھی معاملہ ہے۔‘‘اُنہوں نے مہم جوئی سیاحت کے اِمکانات پر بات کرتے ہوئے کہا،’’پہلگام کی بیتاب ویلی اور گلمرگ میں زِپ لائننگ، ماؤنٹین بائیکنگ اور سمر ٹریکنگ جیسے نئے خیالات پر کام ہو رہا ہے،ہم قومی سطح کے ایڈونچر انفراسٹرکچر فراہم کنندگان کے ساتھ رابطے میں ہیں تاکہ ان خیالات کو عملی شکل دی جا سکے۔‘‘ عمر عبداللہ نے آئی اے ٹی او کی جانب سے رواں برس کے آخر میں ایک پروموشنل ٹوراِزم ایونٹ کے انعقاد کی تجویز کا خیر مقدم کیا اور کہا ،’’ہم جموں و کشمیر سے سرکاری و نجی سطح پر ایک نمائندہ وفد اس ایونٹ میں بھیجنے کے منتظر ہیں تاکہ وادی کی سیاحتی خوبصورتی کو دُنیا کے سامنے پیش کیا جا سکے۔‘‘صدر آئی اے ٹی او روی گوسین نے اَپنے خطاب میں کشمیر کی پروموشن کے لئے مکمل تعاون کی یقین دہانی کرتے ہوئے کہا،’’ ہم کشمیر کی خوبصورتی اور ثقافت کو دُنیا بھر میں اُجاگر کرنے کے لئے پُرعز م ہیں۔‘‘اِس سے قبل بات چیت کے دوران آئی اے ٹی او وفد نے وادی کے اَپنے حالیہ دورے کے دوران بالخصوص 22 ؍اپریل کے بائسرن دہشتگرد حملے کے بعد سیاحتی بحالی کے سلسلے میں مشاہدات، تاثرات اور تجاویز بھی پیش کیں ۔
