رمیش کیسر
نوشہرہ //بھارتیہ جنتا پارٹی کے سینئر رہنما اور سابقہ صدر بی جے پی جموں و کشمیررویندر رینہ نے کہا ہے کہ ’سال 2029 میں بھی نریندر مودی کی قیادت میں بی جے پی چوتھی بار مرکز میں حکومت بنائے گی‘‘۔رام بھون جموں میں بھارتی جنتا پارٹی کے’ 11سال بے مثال‘ مکمل ہونے کے موقع پر منعقدہ تقریب سے خطاب کر رہے تھے۔ اس دوران انہوں نے کہا کہ سال 2014 میں مودی حکومت کے اقتدار میں آنے کے بعد ملک بھر میں ترقی، خوشحالی اور امن کا نیا دور شروع ہوا ہے، خاص طور پر جموں و کشمیر میں۔انہوں نے دعویٰ کیا کہ آج کشمیر میں حالات مکمل طور پر بدل چکے ہیںجہاں کبھی حریت کانفرنس کی طرف سے احتجاجی کلینڈر جاری ہوتے تھے، آج وہاں ریکارڈ ٹورزم ہو رہا ہے۔ دفعہ 370 کے خاتمے کے بعد جموں کشمیر ملک کی ترقی کے ساتھ جْڑ چکا ہے‘۔روندر رینہ نے بتایا کہ ’حال ہی میں مودی جی نے وندے بھارت ٹرین کٹرہ سے کشمیر تک چلا کر جموں و کشمیر کو ملک کے باقی حصوں سے مزید مضبوطی سے جوڑ دیا ہے۔ انہوں نے مزید کہا کہ ’ٹنلز، قومی شاہراہیں، ہسپتال، بزرگوں کی پنشن، مفت راشن، آیوشمان کارڈ، پردھان منتری آواس یوجنا اور اجولا یوجنا جیسے کئی فلاحی اسکیموں سے کروڑوں لوگوں کو فائدہ ہوا ہے‘۔انہوں نے کہا کہ ’’گزشتہ 11 برسوں میں بی جے پی حکومت کے کسی وزیر پر کرپشن کا کوئی الزام نہیں لگا، جو حکومت کی شفافیت اور عوامی خدمت کا ثبوت ہے‘۔رینہ نے کہا کہ کچھ سیاسی جماعتیں جموں کشمیر کی ترقی برداشت نہیں کر پا رہیں، لیکن عوام سب کچھ دیکھ رہے ہیں اور آئندہ انتخابات میں ایک بار پھر مودی کو چنیں گے۔اس موقع پر نوشہرہ کے معروف ٹھیکیدار راجندر چوہدری نے نیشنل کانفرنس کو چھوڑ کر بھارتی جنتا پارٹی میں شمولیت اختیار کی۔ اسی طرح دیہاتوں سے بھی بڑی تعداد میں لوگ بی جے پی میں شامل ہوئے۔تقریب کے اختتام پر پارٹی کارکنان نے ملک کی سالمیت، قومی یکجہتی اور ترقی کے لئے مذہب، ذات اور علاقے سے بالاتر ہو کر کام کرنے کا عہد کیا۔شہر اور دیہی علاقوں سے بی جے پی کے سینئر کارکنوں نے بڑی تعداد میں تقریب میں شرکت کی۔
