عظمیٰ نیوز سروس
ادھم پور//لیفٹیننٹ گورنر منوج سنہا نے جموں و کشمیر پولیس کو اپنے اقدار، روایات اور اخلاقیات کو برقرار رکھنے کی اپیل کی۔وہ اودھم پور میں پروبیشنرز ڈپٹی سپرنٹنڈنٹ آف پولیس کے 17ویں بیچ اور پروبیشنرز سب انسپکٹرز کے 26ویں بیچ کی پاسنگ آئوٹ پریڈسے خطاب کررہے تھے۔لیفٹیننٹ گورنر نے کہا”ہزاروں سالوں سے، ہمارے معاشرے کا ایک اہم حصہ، بہادروںکا ایک گروہ ادھرم پر دھرم کی فتح کو قائم کرنے کے لیے عظیم قربانیاں دے رہا ہے۔ ان ہیروز کے پاس بھگوان برہما کی تخلیقی طاقت، بھگوان وشنو کی پرورش کی طاقت اور بھگوان شیو کی مطلق طاقت ہے۔انہوں نے جموں و کشمیر پولیس کے بہادر دلوں کو خراج تحسین پیش کیا جنہوں نے قوم کے لیے اپنی جانیں نچھاور کیں۔لیفٹیننٹ گورنر نے کہا، “مجھے جموں کشمیر پولیس کے اپنے بہادر اہلکاروں اور افسران پر فخر ہے۔ پوری قوم ہماری پولیس فورس کو پیشہ ورانہ قابلیت کے لیے تعریف اور احترام کی نگاہ سے دیکھتی ہے، جو کہ متعدد محاذوں پر سیکورٹی چیلنجوں سے کامیابی سے نمٹنے اور دہشت گردی کا بے رحمی سے مقابلہ کرنے کے لیے ہے” ۔لیفٹیننٹ گورنر نے کہا کہ پولیس اہلکاروں کو امن، ترقی اور استحکام کو یقینی بنانے کے لیے ہر ممکن طریقے سے پورے معاشرے کی حفاظت کرنی چاہیے۔انہوں نے کہا، “ہماری قدیم اقدار سچائی، انصاف، اخلاقیات، قانون اور گڈ گورننس پر توجہ مرکوز کرتی ہیں- اور ان اقدار کو پولیس کے ذریعے معاشرے میں تحفظ اور پروان چڑھانے کی ضرورت ہے۔”لیفٹیننٹ گورنر نے جموں و کشمیر پولیس فورس پر زور دیا کہ وہ مصنوعی ذہانت جیسی جدید ٹیکنالوجی کو بروئے کار لاتے ہوئے ڈیٹا اکٹھا کرنے اور تجزیہ کرنے کی اپنی صلاحیت کو بڑھا کر سیکورٹی کے خطرات سے نمٹنے، بنیاد پرستی کو روکنے اور منفی حالات پر فتح حاصل کرے۔انہوں نے کہا”جموں کشمیر کی سرزمین سے دہشت گردی کا مکمل خاتمہ ہماری اولین ترجیح ہے۔ پولیس کے ہمارے طاقتور ہیروز کو ایک کثیر الجہتی نقطہ نظر اپنانا چاہیے اور انٹیلی جنس، کمیونٹی کی شمولیت، ٹیکنالوجی، اور انٹر ایجنسی تعاون کی طاقت کو بروئے کار لانا چاہیے۔ٹیکنالوجی میں نمایاں تبدیلیوں کے باوجود، بیٹ پولیسنگ اور ایریا پولیسنگ کا کوئی متبادل نہیں ہے۔ اس لیے ہمیں بیٹ پولیسنگ کو سیکورٹی اپریٹس کے مرکز میں لانا ہوگا۔ لیفٹیننٹ گورنر نے کہا کہ ہمیں انسداد دہشت گردی کی مجموعی کوششوں کو تقویت دینے کے لیے ٹھیک توازن قائم کرنا چاہیے،” ۔لیفٹیننٹ گورنر نے پولیس اہلکاروں سے مزید کہا کہ وہ کمیونٹیز میں اجتماعی چوکسی کو فروغ دینے پر توجہ دیں۔انہوں نے کہا کہ یہ اجتماعی چوکسی نہ صرف پولیس فورس کو دہشت گردوں کے خلاف مربوط جواب کو یقینی بنانے کے قابل بنائے گی بلکہ معاشرے کے تمام طبقات کے ساتھ اعتماد کو بھی مضبوط کرے گی۔لیفٹیننٹ گورنر نے اپنے خطاب میں انٹیلی جنس پر مبنی انسداد دہشت گردی آپریشنز پر زور دیا۔انہوں نے کہا”میں نے جموں و کشمیر پولیس فورس اور سیکورٹی فورسز کو جموں و کشمیر کے اندر دہشت گردوں اور دہشت گردی کے ماحولیاتی نظام سے نمٹنے کے لئے آزاد ہاتھ دیا ہے، میں چاہتا ہوں کہ طاقتور پولیس فورس، سب سے طاقتور ہندوستانی فوج اور بہادر CAPF دہشت گردوں اور ان کے سپورٹ سسٹم کا صفایا کرنے کے لئے مل کر کام کریں‘‘۔لیفٹیننٹ گورنر نے کہاہمیں OGWs نیٹ ورک پر ٹارگٹڈ آپریشن کو تیز کرنا چاہیے اور دہشت گردوں کو لاجسٹک اور مالی مدد فراہم کرنے والے عناصر کو انصاف کے کٹہرے میں لایا جانا چاہیے،” ۔
