سمت بھارگو
راجوری//راجوری سیکٹر کی لائن آف کنٹرول پر جاری دہشت گرد مخالف آپریشن دوسرے روز بھی پوری شدت کے ساتھ جاری رہا۔فوج نے بارات گلہ، کیری سیکٹر میں دراندازی کی ایک بڑی کوشش کو ناکام بناتے ہوئے ہفتے کی صبح ہی آپریشن کا آغاز کیا تھا، جو اب تک جاری ہے۔فوجی ذرائع کے مطابق ہفتے کی علی الصبح بھاری اسلحے سے لیس دہشت گردوں کے ایک گروہ نے سرحد پار سے بھارت میں داخل ہونے کی کوشش کی، جسے مستعد بھارتی فوجیوں نے بروقت کارروائی کرتے ہوئے ناکام بنا دیا۔ اس دوران دونوں طرف سے فائرنگ کا تبادلہ بھی ہوا۔فوج نے فوری طور پر علاقے میں بڑے پیمانے پر کارڈن اینڈ سرچ آپریشن (CASO) شروع کر دیا۔ اتوار کو آپریشن کا دائرہ وسیع کرتے ہوئے اسے قریبی جنگلاتی علاقوں اور لائن آف کنٹرول کے دیگر حساس مقامات تک پھیلا دیا گیا ہے۔ذرائع کا کہنا ہے کہ انسداد دراندازی رکاوٹ نظام کے ساتھ ساتھ فارورڈ لوکیشنز کو بھی مکمل طور پر گھیرے میں لے لیا گیا ہے، اور اضافی فوجی دستے تعینات کر دئیے گئے ہیں تاکہ کسی بھی ممکنہ خطرے سے نمٹا جا سکے۔حکام کا کہنا ہے کہ آپریشن اس وقت تک جاری رہے گا جب تک مکمل طور پر یقین نہ ہو جائے کہ کوئی دہشت گرد علاقے میں موجود نہیں۔ مقامی ذرائع نے بتایا ہے کہ فوج علاقے میں مکمل چوکس ہے اور ہر حرکت پر گہری نظر رکھے ہوئے ہے۔یاد رہے کہ راجوری اور پونچھ اضلاع میں گزشتہ کچھ عرصے سے دراندازی کی کوششوں میں اضافہ دیکھا جا رہا ہے، جس کا مقصد خطے میں بدامنی پھیلانا ہے۔ تاہم بھارتی فوج کی بروقت کارروائیاں ان کوششوں کو ناکام بنانے میں کامیاب رہی ہیں۔
