رمیش کیسر
نوشہرہ//نائب وزیر اعلیٰ سریندر چوہدری نے نوشہرہ کی پنچایت پھنڈتا میں ایک عوامی شکایات کیمپ کا انعقاد کیا جس کا مقصد عوامی مسائل کو براہ راست جاننا اور انتظامیہ کو عوام کے دروازے تک لانا تھا۔ کیمپ میں مختلف طبقہ ہائے فکر سے تعلق رکھنے والے لوگوں نے بڑی تعداد میں شرکت کی اور سڑکوں کی خستہ حالی، پانی کی قلت، مختلف محکموں میں عملے کی کمی، بجلی کے بنیادی ڈھانچے کی کمزوری جیسے مسائل کو اجاگر کیا۔ڈپٹی چیف منسٹر نے عوام کی شکایات کا بغور جائزہ لیا اور موقع پر ہی متعلقہ افسران کو ہدایات جاری کیں کہ عوامی مسائل کے فوری حل کو یقینی بنایا جائے۔ انہوں نے کہا کہ عوام کے جائز مطالبات کو اولین ترجیح پر پورا کیا جائے گا۔انہوں نے افسران کو متنبہ کرتے ہوئے کہا کہ کسی بھی قسم کی لاپرواہی یا کوتاہی کو برداشت نہیں کیا جائے گا۔ سرکاری ملازمین کو اپنی قانونی ذمہ داریوں کو بغیر کسی تساہل کے انجام دینا ہوگا ورنہ سخت کارروائی عمل میں لائی جائے گی۔نائب وزیر اعلیٰ نے اس موقع پر کہا کہ حکومت عوامی مسائل کے حل کے لئے پرعزم ہے اور وزیر اعلیٰ عمر عبداللہ کی قیادت میں موجودہ انتظامیہ مؤثر طرز حکمرانی کی فراہمی کیلئے ہر ممکن کوشش کر رہی ہے۔ انہوں نے کہا کہ حکومت ہمیشہ سے عوامی مفادات کی علمبردار رہی ہے اور عوامی شکایات کو ترجیحی بنیادوں پر حل کرنا ہماری اولین ترجیح ہے۔انہوں نے مزید کہا کہ عوامی دربار صرف شکایات درج کرانے کا ذریعہ نہیں بلکہ یہ جمہوری طرز حکمرانی کی ایک زندہ مثال ہے، جہاں عوام اور حکومت کے درمیان براہ راست رابطے کو فروغ دیا جاتا ہے تاکہ بھروسہ اور جوابدہی کو یقینی بنایا جا سکے۔اس موقع پر ایڈیشنل ڈپٹی کمشنر نوشہرہ پرتھم لال تھاپا، سپرنٹنڈنگ انجینئر پی ڈبلیو ڈی (آر اینڈ بی) تلک راج، اے سی ڈی اوعقیل نوید، ڈپٹی ڈائریکٹر ایجوکیشن محمد نواز چودھری کے علاوہ ضلع اور مختلف محکموں کے افسران بھی موجود تھے۔
