پرویز احمد
سرینگر //عمر رسیدہ افرادکو درپیش ’’گھریلوزیادتیوں کی جانکاری کے عالمی دن‘‘ کے موقع پر جہاں پورے دنیا سمیت ملک کی مختلف ریاستوں میں بزرگوں کو تحفظ فراہم کرنے کی قسمیں کھائی جارہی ہیں وہیں مرکزی زیر انتظام جموں و کشمیر میں سال 2022 میں گھریلو زیادتی کے شکارعمرسیدہ افراد کو ’ اٹل وایو ابھیودیا یوجنا‘‘(Atal Vayo Abhyuday Yojna) کے تحت قائم کئے گئے اولڈ ایج ہوم بند ہونے کی کگار پر ہیں۔ اس سکیم کو اپریل 2021 میں شروع کیا گیا تھا۔ حکومتی سکیم کا مقصد ملک کے اہل بزرگ شہریوں کو بنیادی سہولیات اور پناہ گاہ، خوراک کے ذرائع اور مالی امداد کی شکل میں سماجی تحفظ فراہم کرنا ہے۔ سکیم کا ایک اور مقصد اس بات کو یقینی بنانا ہے کہ ایسے فائدہ اٹھانے والے ایک نتیجہ خیز اور فعال بڑھاپا بسر کریں۔ جموں و کشمیر میں بزرگ شہریوں (60+) کی تعداد واضح طور پر نہیں بتائی گئی ہے۔ تاہم بز 85 سال اور اس سے زیادہ عمر کے 1.50 لاکھ بزرگ شہری الیکشن کمیشن میں رجسٹر ہیں۔جموں و کشمیر میں 70سال سے زیادہ عمر کے 29,599لاکھ لوگ ہیں۔ ان میں کشمیر میں 15لاکھ 659ہیں جبکہ باقی جموں سے تعلق رکھتے ہیں۔یہ سبھی محکمہ سماج۹ی بہبود میں رجسٹر ہیں۔مرکزی سکیم کے تحت جموں و کشمیر میں قائم کئے گئے 20’احاط وقار ‘کے منتظمین کو سرکار نے بلڈنگ کا کرایہ، ملازمین کی تنخواہیں اور اس میں رہنے والے افراد کیلئے خوراک فراہم کرنے کی یقین دہانی کرائی تھی لیکن 3سال گذر جانے کے باوجود بھی کوئی بھی رقم فراہم نہیں کی گئی ہے اور مذکورہ سکیم چلانے والے لوگ قرضوں میں ڈوب گئے ہیں۔ وادی میں عمر رسیدہ افراد کے خلاف گھریلو زیادتیوں کے واقعات میں اضافہ ہورہا ہے اوربچے والدین سے چھٹکارہ پانے اور ان کی جائیداد پر قبضہ کرنے کیلئے انکو اولڈ ایج ہومز میں چھوڑ دینے کیلئے تیار ہوجاتے ہیں۔احاط وقار گاندربل کے صدر سمیر احمد نے کشمیر عظمیٰ کو بتایاکہ سماج میںعمر رسیدہ افراد کے خلاف زیادتیوں میں اضافہ ہورہا ہے ۔ انکا کہنا تھا کہ احاط وقار گاندربل میں اسوقت 25عمر رسیدہ افراد رہتے ہیں اور ان میں اکثریت ان کی ہیں جن کے بچوں نے جائیداد حاصل کرنے کے بعد والدین کو گھروں سے نکالا ہے۔ انہوں نے کہا ’’ کبھی کسی کا بیٹا توکبھی کسی کی بیٹی فون کرتی ہے کہ ہمارے والد کو اولڈ ایج ہوم لے جائو اور جب ہم کونسلنگ کیلئے ان کے پاس جاتے ہیں تو معلوم ہوتا ہے کہ بچے والدین کو زندگی کے کسی بھی فیصلے میں شامل نہیں کرنا چاہتے۔ سمیر کا کہنا تھا کہ اسی وجہ سے ان کے والدین تنہائی اور ذہنی دبائو کے شکار ہوجاتے ہیں۔احاط وقار اننت ناگ کے صدر ہلال احمد نے بتایا ’’ لاوارث اور گھریلو زیادتی کے شکار لوگوں کیلئے مرکزی سرکار نے جولائی 2022میں مرکزی سکیم کے تحت 20احاط وقار رضاکار تنظیموں کے اشتراک سے کھولے ۔ ہلال نے بتایا’’ معاہدے کے تحت مرکزی سرکار کو ان ا حاط وقار کیلئے استعمال ہونے والی بلڈنگوں کا کرایہ، ملازمین کی تنخواہیں اور مستفید ہونے والے عمر رسیدہ افراد کیلئے خوراک کی رقم فراہم کرنی تھی لیکن 3سال کا عرصہ گزرجانے کے باوجود کچھ بھی فراہم نہیں کیا گیا۔ہلال نے بتایا کہ 20احاط وقار میں 150سے زائد عمر رسیدہ افراد رہتے ہیں لیکن سرکار کو ان کی کوئی فکر نہیں ہے۔
