مسئلہ کشمیر حل کرسکتے ہیں، ہندپاک کے طویل تنازعے کو ختم کرسکتے ہیں: ٹرمپ

عظمیٰ ویب ڈیسک
سرینگر/بھارت کی جانب سے بار بار انکار کے باوجود امریکی صدر ڈونلڈ ٹرمپ نے ایک با ر پھر کشمیر پر ثالثی کی پیشکش کی ہے ۔امریکی صدر ڈونالڈ ٹرمپ نے وائٹ ہاؤس میں ایک بل پر دستخط کرنے والی تقریب سے خطاب کرتے ہوئے کہا کہ وہ ہندوستان اور پاکستان کے درمیان دیرینہ تنازعہ کشمیر کو حل کر سکتے ہیں۔ ٹرمپ نے بھارت اور پاکستان کے درمیان جنگ بندی کی خلاف ورزی کا حوالہ دیتے ہوئے دعویٰ کیا کہ ’میں نے اس جنگ کو فون کالز اور تجارت کے ذریعے روک دیا ہے‘‘ تاہم بھارت نے مسترد کر دیا ہے۔
ٹرمپ نے تسلیم کیا کہ دونوں ممالک کشمیر پر ایک طویل عرصے سے دشمنی میں بندھے ہوئے ہیں، جب کہ سختی سے کہا کہ وہ ’’کچھ بھی حل ‘‘کر سکتے ہیں۔انہوں نے مزید کہا ’’میں نے ہندوستان اور پاکستان کے درمیان جنگ کو روکا، اور میں نے اسے تجارت کے ساتھ کیا۔ ‘‘ ٹرمپ نے کہا، ’’مجھے نہیں لگتا کہ کسی نے اس کے بارے میں کبھی لکھا ہے، لیکن یہ بہت اچھا تھا، وہ تیار ہو رہے تھے‘‘۔
انہوں نے دعویٰ کیا کہ انہوں نے فون کالز اور تجارتی فائدہ اٹھا کر ہندوستان اور پاکستان کے درمیان ممکنہ جنگ کو روکا۔ٹرمپ نے کہا کہ تناؤ اس حد تک بڑھ گیا ہے کہ ’’پاکستان کی باری ہے‘‘ اور خبردار کیا کہ صورت حال جوہری تصادم کی طرف بڑھ سکتی ہے۔ انہوں نے کہا ’’ میں نے ان میں سے ہر ایک کو فون کیا۔ میں دونوں رہنماؤں کا بہت احترام کرتا ہوں، میں انہیں جانتا ہوں۔ میں نے ان سے تجارت کے بارے میں بات کی۔ ‘‘