عظمیٰ نیوز سروس
سرینگر: اپنی پارٹی سربراہ سید محمد الطاف بخاری نے پارٹی رہنمائوں اور سینئر کارکنوں پر زور دیا کہ وہ اپنے علاقوں میں اپنی سیاسی سرگرمیاں اور عوامی رابطہ مہم میں تیزی لائیں۔ سرینگر میں پارٹی مجلس عاملہ اجلاس کی صدارت کرتے ہوئے انہوں نے پارٹی لیڈران اور سینئر کارکنان پر زور دیا کہ وہ متحرک ہوجائیں اور زمینی سطح پر عوام کے ساتھ رابطے میں رہیں۔انہوں نے کہا، “آنے والے بلدیاتی اور پنچایتی انتخابات کے پیش نظر، یہ ضروری ہے کہ ہم متحرک ہوجائیں اور اپنی سیاسی سرگرمیوں میں سرعت لائیں۔ عوام کے ساتھ قریبی روابط برقرار رکھنے سے پارٹی کے عوام نواز ایجنڈے اور پالیسیوں کے بارے میں بیداری پیدا کرنے میں بھی مدد ملے گی۔انہوں نے مزید کہا، یہ ہماری ذمہ داری ہے کہ لوگوں کو اپنی پارٹی کے بنیادی ایجنڈے سے آگاہ کریں تاکہ انہیں پتہ ہو کہ اپنی پارٹی کا بنیادی مقصد جموں کشمیر میں دائمی امن و استحکام، عوام کی خوشحالی اور ترقی کے لئے کام کرنا ہے اور ہم جموں کشمیر کو معاشی لحاظ سے با اختیار دیکھنا چاہتے ہیں۔اس موقعے پرسینئر نائب صدر غلام حسن میر، پارٹی کی پارلیمانی امور کمیٹی کے چیئرمین محمد دلاور میر، نائب صدر جاوید مصطفی میر، جنرل سیکرٹری رفیع احمد میر، ایڈیشنل جنرل سیکرٹری ہلال احمد شاہ، صوبائی صدر کشمیر محمد اشرف میر، چیف کوآرڈی نیٹر اور ضلع صدر عبدالمجید پڈر، ترجمانِ اعلی اور سٹیٹ سیکرٹری منتظر محی الدین، میڈیا ایڈوائزر فاروق اندرابی، پارٹی کی یوتھ ونگ کے صدر یاور میراور دیگرلیڈران موجود تھے۔
