یو این آئی
سرینگر// وزیر تعلیم سکینہ ایتو نے بدھ کے روز کہا کہ وادی میں جاری شدید گرمی کی لہر کے پیش نظر حکومت سکولوں کے لیے جلد تعطیلات کا اعلان کرنے پر سنجیدگی سے غور کر رہی ہے ۔انہوں نے کہا کہ محکمہ تعلیم موسمی حالات پر مسلسل نظر رکھے ہوئے ہے اور صورتحال کے مطابق فیصلہ لیا جائے گا۔سرینگر میں نامہ نگاروں سے بات کرتے ہوئے سکینہ ایتو نے کہا‘ محکمہ تعلیم موجودہ موسمی حالات کا بغور جائزہ لے رہا ہے، اگر ہمیں محسوس ہوا کہ قبل از وقت تعطیلات ضروری ہے ، تو ہم اس پر فیصلہ لیں گے‘ ۔انہوں نے مزید کہا ‘ابھی صرف دو دن ہوئے ہیں جب گرمی کی شدت میں اضافہ ہوا ہے، اگرگرمی کی لہر برقرار رہی، تو حکومت جلد تعطیلات کے حوالے سے اقدام کرے گی۔’ادھر والدین کی جانب سے سکولوں میں مختصر دورانیہ کی تعطیلات کا مطالبہ کیاہے ۔موسم کی شدت اور وادی کے بیشتر سکولوں میں ناکافی انتظامات کے پیش نظر والدین کا کہنا ہے کہ حکومت فوری طور پر سکولوں کے لیے مختصر دورانیے کی تعطیلات کا اعلان کرے تاکہ بچوں کی صحت کو محفوظ رکھا جا سکے ۔والدین کا کہنا ہے کہ طلبہ گرمی کی شدت سے نڈھال ہو رہے ہیں، کلاسز میں توجہ دینا ممکن نہیں رہا۔ کئی بچے بے ہوشی، تھکن اور گھبراہٹ کا شکار ہو رہے ہیں۔ حکومت کو فوری فیصلہ کرنا چاہیے ۔
