عظمیٰ نیوز سروس
راجوری//عید الاضحی کے پْرامن اور منظم انعقاد کو یقینی بنانے کے لئے ضلع ترقیاتی کمشنر راجوری ابھیشیک شرما اور سینئر سپرنٹنڈنٹ آف پولیس (ایس ایس پی) نے جمعہ کے روز مرکزی عیدگاہ راجوری کا دورہ کیا۔ اس موقع پر دونوں افسران نے انتظامیہ اور پولیس کے دیگر اہلکاروں کے ہمراہ موقع کا معائنہ کیا اور عید کی نماز کے سلسلے میں کی جانے والی تیاریوں کا جائزہ لیا۔دورے کے دوران ڈی سی راجوری نے صفائی، پانی کی فراہمی، ٹریفک مینجمنٹ اور دیگر بنیادی سہولیات کو بروقت مکمل کرنے کی ہدایت دی۔ انہوں نے کہا کہ عوام کی سہولت اور مذہبی سرگرمیوں کا احترام انتظامیہ کی اولین ترجیح ہے۔ انہوں نے بلدیاتی اداروں کو ہدایت دی کہ عیدگاہ میں صفائی ستھرائی، روشنی کا انتظام اور دیگر ضروری سہولیات یقینی بنائی جائیں۔ایس ایس پی راجوری نے کہا کہ عید کے موقع پر سیکورٹی کے سخت انتظامات کئے جا رہے ہیں تاکہ کسی بھی ناخوشگوار واقعہ سے بچا جا سکے۔ انہوں نے کہا کہ نماز عید کے دوران پولیس اور دیگر سیکورٹی اداروں کی تعیناتی کی جائے گی اور ٹریفک کو منظم رکھنے کے لئے خصوصی اقدامات کئے گئے ہیں۔دونوں افسران نے عوام سے اپیل کی کہ وہ باہمی ہم آہنگی اور بھائی چارے کے ساتھ عید منائیں اور انتظامیہ کے ساتھ تعاون کریں تاکہ تہوار پْرامن اور خوشگوار انداز میں منایا جا سکے۔
