سمت بھارگو
راجوری//عیدالاضحی کی آمدپرراجوری کی عید منڈی میں قربانی کے جانوروں کی خریداری کے لئے عوام کی بڑی تعداد اْمڈ پڑی ہے۔ شہر اور مضافاتی علاقوں سے لوگ بکروں، بھیڑوں اور دیگر قربانی کے جانوروں کی خریداری کے لئے منڈی کا رخ کر رہے ہیں۔ منڈی میں دن بھر خریداروں اور بیوپاریوں کی گہما گہمی دیکھی جا رہی ہے۔عوام نے شکایت کی کہ اس سال جانوروں کی قیمتوں میں خاصا اضافہ ہوا ہے، جس کی وجہ سے متوسط طبقے کو خریداری میں دشواری پیش آ رہی ہے۔ بیوپاریوں کا کہنا ہے کہ جانوروں کی خوراک، ٹرانسپورٹ اور دیگر اخراجات میں اضافے کی وجہ سے قیمتیں بڑھی ہیں تاہم، خریدار اور فروخت کنندہ دونوں ہی بہتر سودے کی کوشش میں مصروف نظر آتے ہیں۔انتظامیہ کی جانب سے عید منڈی میں صفائی، پانی، روشنی اور ٹریفک نظام کے بہتر انتظامات کئے گئے ہیں۔عوام نے مطالبہ کیا ہے کہ قیمتوں کو قابو میں رکھنے کے لئے انتظامیہ مؤثر نگرانی کرے تاکہ ہر کوئی اپنی استطاعت کے مطابق قربانی کا فریضہ ادا کر سکے۔ عید منڈی کی یہ گہما گہمی قربانی کے جذبے اور مذہبی جوش و خروش کی عکاس ہے۔
