عظمیٰ نیوز سروس
کٹرا(ریاسی)//مرکزی ریلوے وزیر اشونی ویشنو نے جموں و کشمیر کیلئے ریلوے رابطے کو ایک ‘تاریخی سنگ میل’ قرار دیتے ہوئے کہا ہے کہ کشمیر کو ملک کے دیگر حصوں سے جوڑنے کا خواب وزیر اعظم نریندر مودی کی قیادت اور مسلسل محنت سے ہی ممکن ہوا ہے ۔کٹرا میں عوامی جلسے سے خطاب کے دوران مرکزی ریلوے وزیر اشونی ویشنو نے کہا’’‘جموںسرینگربارہمولا ریلوے لائن کا خواب قوم نے کئی دہائیوں سے دیکھ رکھا تھا۔ قدرتی رکاوٹیں جیسے کہ بلند و بالا پہاڑ اور گہری وادیاں اس راہ میں بڑی چنوتیاں تھیں، لیکن ہم نے فطرت سے لڑنے کے بجائے اس کے ساتھ ہم آہنگ ہو کر پلوں اور سرنگوں کا ایسا جال بچھایا جس سے یہ خواب آج حقیقت میں بدل گیا‘‘۔انہوں نے کہا کہ یہ سب کچھ وزیر اعظم مودی کے ’پختہ ارادے‘ تدبر اور ملک گیر نظریے کی بدولت ممکن ہوا ہے ۔ریلوے وزیر نے کہا کہ یہ صرف ایک ریلوے لائن نہیں بلکہ قومی یکجہتی، علاقائی ہم آہنگی اور اقتصادی ترقی کی جانب ایک انقلابی قدم ہے ۔انہوں نے کہا کہ آج بھارت کے تاج میں ایک اور نایاب جواہر جُڑ گیا ہے ۔جموں-بارہمولہ ریلوے لائن پر گزشتہ دو دہائیوں سے کام جاری تھا، لیکن مشکل جغرافیائی حالات، شدید موسمی رکاوٹوں اور تکنیکی چنوتیوں کے باعث اس منصوبے کو مکمل ہونے میں طویل وقت لگا۔ حالیہ برسوں میں یو ٹی میں بڑھتے انفراسٹرکچر اقدامات کے بعد اس منصوبے کو تیزی ملی، اور اب سری نگر وادی کو ملک کے باقی حصوں سے ریلوے کے ذریعے جوڑنے والا خواب شرمندئہ تعبیر ہو چکا ہے ۔
