عظمیٰ نیوز سروس
راجوری //عالمی یوم ماحولیات کے موقع پر فوج نے ماحولیاتی تحفظ اور عوامی شعور بیداری کے جذبے کے تحت پونچھ، راجوری اور ریاسی اضلاع کے مختلف علاقوں میں عالمی یوم ماحولیات کی مناسبت سے پروگرام منعقد کئے جن کے دوران سینکڑوں پودے لگائے گئے ۔فوج کی جانب سے جاری بیان کے مطابق خطہ پیر پنچال کے دبڑ پوٹھہ ،چنی پڑاٹ،ساگرہ ،کوٹرنکہ ،چسانہ و دیگر مقامات پر شجرکاری مہم کا انعقاد کیا۔ اس اقدام کا مقصد زمین کی بحالی اور صحرا زدگی کو روکنا تھا، جو ماحولیات کے تحفظ کی فوری ضرورت کو اجاگر کرتا ہے۔اس مہم میں مقامی دیہاتیوں، پنچایت ممبران اور اسکول کے بچوں نے بڑی جوش و خروش سے حصہ لیا۔ اس دوران مختلف اقسام کے 230 سے زائد پودے لگائے گئے، جن میں سایہ دار مقامی درخت، دوائوں میں استعمال ہونے والے پودے اور پھل دار درخت شامل تھے۔ پودوں کا انتخاب مقامی مٹی کی نوعیت اور ماحولیاتی تقاضوں کو مدنظر رکھتے ہوئے کیا گیا تاکہ ان کی پائیداری اور دیرپا افزائش یقینی بنائی جا سکے۔درخت لگانے کے ساتھ ساتھ ماحولیاتی تحفظ کے حوالے سے ایک بیداری پروگرام بھی منعقد کیا گیا، جس میں شرکاء کو ماحولیاتی مسائل، موسمیاتی تبدیلی، حیاتیاتی تنوع کے تحفظ اور ماحولیاتی توازن کی اہمیت سے آگاہ کیا گیا۔یہ پروگرام بھارتی فوج کے قومی سلامتی کے ساتھ ساتھ ماحولیاتی تحفظ اور سماجی ذمے داری کے عزم کی عکاسی کرتا ہے۔ مجموعی طور پر 535 افراد نے اس مہم میں شرکت کی۔ اساتذہ، طلباء اور مقامی افراد نے بھارتی فوج کی اس مثبت پہل کی دل کھول کر تعریف کی اور اسے کمیونٹی کی ترقی کی سمت ایک اہم قدم قرار دیا۔یہ شجرکاری مہم بھارتی فوج اور مقامی عوام کے درمیان گہرے تعلقات کی علامت ہے اور اس بات کی دلیل ہے کہ عالمی ماحولیاتی چیلنجوں کا حل مقامی سطح پر مشترکہ کوششوں سے ممکن ہے۔ بھارتی فوج کا یہ اقدام نہ صرف ماحولیاتی شعور بیدار کرنے کا ذریعہ بنا بلکہ آنے والی نسلوں کے لئے ایک سرسبز اور محفوظ مستقبل کی امید بھی پیدا کی۔
