امتیاز خان
کٹرا//بھارتی ریلوے کی ایک نئی تاریخ رقم کی گئی ہے۔جو اب تک نا ممکن تھا اسے ممکن بنا دیا گیا ہے اورریلوے کے ایک نئے سنگ میل کی بنیاد ڈالی گئی ہے۔پی ایم نریندرمودی کی طرف سے کٹرا-سرینگر وندے بھارت ایکسپریس کو ہری جھنڈی دکھانے کیساتھ ہی تقریباً30سال کے طویل انتظار کے بعدریلوے کا ایک عجوبہ مکمل کیا گیا ہے۔ یہ وادی کشمیر اور جموں خطے کے درمیان پہلا ٹرین رابطہ ہے۔مودی نے ریلوے کے وزیر اشونی ویشنو، جموں و کشمیر کے ایل جی منوج سنہا اور وزیر اعلیٰ عمر عبداللہ سمیت دیگر کی موجودگی میں ٹرین کا افتتاح کیا۔ وزیر اعظم نریندر مودی نے چناب پل، انجی ریل پل اور ادھم پور-سری نر-بارہمولہ ریل لنک پروجیکٹ کا افتتاح کیا اور کشمیر کو کنیا کماری سے جوڑنے والی وندے بھارت ٹرینوں کو ہری جھنڈی دکھائی۔ وزیر اعظم نے پہلی ٹرین سروس کو ہری جھنڈی دکھانے اور دریائے چناب پر دنیا کے بلند ترین ریلوے پل سمیت کئی ترقیاتی منصوبوں کا افتتاح کرنے کے بعد ایک عوامی ریلی سے خطاب کیا۔وزیر اعظم نے اس موقعہ پر کہا کہ پاکستان نے پہلگام میں سیاحوں کو نشانہ بنا کر ‘انسانیت’ اور کشمیریت پر حملہ کیا۔انہوں نے کہاکہ اس کا مقصد ہندوستان میں فرقہ وارانہ تصادم کو ہوا دینا اور سیاحت پر منحصر کشمیری لوگوں کو تباہ کرنا ہے۔
پاکستان
انہوں نے کہا کہ سیاحت روزگار فراہم کرتی ہے اور لوگوں کے درمیان رابطے کا کام کرتی ہے لیکن بدقسمتی سے پڑوسی ملک انسانیت، ہم آہنگی اور سیاحت کا دشمن ہے۔انہوں نے کہا کہ صرف یہی نہیں بلکہ پاکستان غریبوں کی روٹی اور مکھن کا بھی دشمن ہے۔22 اپریل کو پہلگام میں جو کچھ ہوا وہ اس کی ایک مثال ہے اورپاکستان نے پہلگام میں انسانیت اور کشمیریت پر حملہ کیا۔انہوں نے کہا کہ “پاکستان کا مقصد ہندوستان میں فرقہ وارانہ فسادات کو ہوا دینا تھا، وہ کشمیر کے لوگوں سے ان کی کمائی چھیننا چاہتا تھا، اسی لیے پاکستان نے سیاحت پر حملہ کیا،” ۔
جموں و کشمیر تاج
جموں و کشمیر کے لوگوں کو اپنی مکمل حمایت کا یقین دلاتے ہوئے، جسے انہوں نے “ہندوستان کا تاج” قرار دیا، وزیر اعظم نے عہد کیا کہ “میں پہلگام دہشت گردانہ حملے کو جموں و کشمیر میں ترقی کو روکنے نہیں دوں گا، نوجوانوں کے خواب پورے ہوں گے اور کسی بھی رکاوٹ کا سب سے پہلے مودی کو سامنا کرنا ہوگا،” ۔وزیر اعظم نے کہا”آج، جموں کشمیر کے لوگ نئے خواب دیکھ رہے ہیں، اور انہیں پورا بھی کر رہے ہیں۔ نوجوان شاپنگ مالز کی تعمیر، سنیما ہالز کے افتتاح سے خوش ہیں۔ وہ چاہتے ہیں کہ جموں و کشمیر فلموں کی شوٹنگ کا ایک نمایاں مقام بنے۔ وہ یہ بھی چاہتے ہیں کہ یہ خطہ کھیلوں کا مرکز بنے،” ۔مودی نے کشمیری پنڈتوں کے ایک بڑے تہوار، مشہور کھیر بھوانی میلے میں بھاری ٹرن آئوٹ کی بھی تعریف کی، اور نوٹ کیا کہ سالانہ امرناتھ یاترا 3 جولائی کو شروع ہونے والی ہے۔انہوں نے کہا کہ عید کی خوشیاں عروج پر ہیں اور میں وعدہ کرتا ہوں کہ پہلگام واقعہ سے ترقی متاثر نہیں ہوگی۔پہلگام حملے کے تناظر میں پاکستان کی سازش کے خلاف ایک ساتھ کھڑے ہونے پر جموں کشمیر کے لوگوں کی تعریف کرتے ہوئے، مودی نے کہا کہ حملے کے خلاف ان کے موقف نے دنیا بھر میں دہشت گردانہ ذہنیت کے حامل لوگوں کو ایک مضبوط پیغام دیا ہے کہ انہوں نے دہشت گردی کا منہ توڑ جواب دینے کا اپنا ذہن بنا لیا ہے۔مودی نے کہا، کشمیر میں کئی دہائیوں سے جاری دہشت گردی نے سکولوں کو جلا دیا اور دو نسلوں کا مستقبل تباہ کر دیا، صرف سکول ہی نہیں، ہسپتالوں کو بھی جلایا اور یہاں تک کہ الیکشن لڑنا بھی مقامی لوگوں کے لیے ایک چیلنج بن گیا۔ یہ بتاتے ہوئے کہ لوگوں نے کئی دہائیوں تک دہشت گردی اور اس کی وجہ سے ہونے والی تباہی کو برداشت کیا، وزیر اعظم نے کہا، “لوگوں نے خواب دیکھنا چھوڑ دیا تھا اور سوچا تھا کہ دہشت گردی ان کا مستقبل ہے،جموں و کشمیر کو دہشت گردی کی لعنت سے نکالنا ناگزیر تھا، جسے ہم نے کامیابی سے انجام دیا ہے۔”
گولہ باری
6 مئی اور 10 مئی کے درمیان جموں کشمیر کے سرحدی اضلاع میں پاکستان کی گولہ باری سے ہونے والے جانی نقصان اور بھاری نقصان کا حوالہ دیتے ہوئے مودی نے کہا کہ پاکستانی فوج کی کارروائی اس کی مایوسی کو ظاہر کرتی ہے کیونکہ اس نے جموں، پونچھ اور دیگر اضلاع میں شہری علاقوں کو نشانہ بنایا۔مودی نے کہا، “پوری دنیا نے دیکھا کہ کس طرح پاکستان نے گھروں، سکولوں، مندروں، مساجد اور گوردواروں کو تباہ کیا،” ۔انہوں نے آپریشن سندور کے دوران پاکستان کی جانب سے سرحد پار سے بلااشتعال گولہ باری کا بہادری سے سامنا کرنے پر سرحدی باشندوں کی تعریف کی اور جن خاندانوں کے مکانات مکمل طور پر تباہ ہوئے ان کے لیے 2 لاکھ روپے اور جن کے مکانات کو جزوی نقصان پہنچا ان کے لیے 1 لاکھ روپے کی اضافی امداد کا اعلان کیا۔مودی نے کہا، “جن لوگوں نے اپنی جانیں گنوائیں ان کے لواحقین کو حال ہی میں ہمدردی کی بنیاد پر نوکریاں سونپی گئی ہیں۔مودی نے کہا کہ ہم 2,000 سے زیادہ خاندانوں کے دکھ میں شریک ہیں جن کے مکانات کو نقصان پہنچا ہے اور انہیں مرمت کے کام کے لیے مناسب امداد فراہم کی جائے گی،” ۔یہ بتاتے ہوئے کہ مرکز نے گولہ باری کے متاثرین کے لیے امدادی پیکج کو مزید بڑھانے کا فیصلہ کیا ہے، انہوں نے کہا، “مکمل طور پر تباہ شدہ مکانات کے مالکان کو اضافی 2 لاکھ روپے اور جزوی طور پر تباہ ہونے والے مکانات کو 1 لاکھ روپے فراہم کیے جائیں گے۔”وزیر اعظم نے یہ بھی کہا کہ ان کی حکومت نے گزشتہ کئی سالوں میں سرحدی باشندوں کی فلاح و بہبود کے لیے انتھک کام کیا، سرحدی دیہاتوں میں 10,000 سے زائد زیر زمین بنکر تعمیر کیے، جس سے پاکستانی گولہ باری کے دوران لوگوں کی جانیں بچانے میں مدد ملی۔ مودی نے کہا کہ دو سرحدی بٹالین قائم کی گئیں، جو سرحدی باشندوں کو روزگار فراہم کر رہی ہیں، جبکہ دو خواتین بٹالین کے قیام کا عمل تقریبا مکمل ہو چکا ہے۔
