عظمیٰ نیوز سروس
سرینگر// لیفٹیننٹ گورنر منوج سنہا نے منگل کو تین سرکاری ملازمین کو برطرف کر دیا، جو لشکر طیبہاور حزب المجاہدین کے لیے کام کر رہے تھے۔ اگست 2020 میں عہدہ سنبھالنے کے بعد سے، منوج سنہا نے فعال ملی ٹینٹوں اور ان کے معاون نیٹ ورکس، بشمول اوور گرانڈ ورکرز اور سرکاری اداروں میں سرایت کرنے والے ہمدردوں دونوں کو نشانہ بنا کر دہشت گردی کے بنیادی ڈھانچے کو کمزور کرنے کو ترجیح دی ہے۔سنہا نے 2020 اور 2024 کے درمیان جموں و کشمیر میں سینکڑوں ملی ٹینٹوں کو بے اثر کرنے اور ہندوستانی آئین کے آرٹیکل 311(2)(c) کے تحت 75 سے زیادہ ملی ٹینٹ ساتھیوں کو سرکاری ملازمتوں سے برطرف کرنے کے ساتھ، جارحانہ انسداد دہشت گردی کی کارروائیوں کو یقینی بنایا ہے۔ اس نے دہشت گردی اور ان کے معاون ڈھانچے کو جڑ سے اکھاڑ پھینکنے کا عہد کیا ہے، دہشت گردوں اور ان کے معاونین کے خلاف سخت کارروائی کو یقینی بنایا ہے۔برطرف کیے گئے تین ملازمین جیل میں ہیں۔ انکی شناخت پولیس کانسٹیبل ملک اشفاق نصیر،، محکمہ سکول ایجوکیشن میں استاد اعجاز احمد اور جونیئر اسسٹنٹ( گورنمنٹ میڈیکل کالج سری نگر) وسیم احمد خان شامل ہیں۔بیان میں کہا گیا ہے کہ لیفٹیننٹ گورنر کی طرف سے برطرف کیے گئے سرکاری ملازمین دہشت گرد تنظیموں کے لیے سرگرمی سے کام کر رہے تھے اور سیکورٹی فورسز اور شہریوں پر دہشت گردانہ حملوں کو انجام دینے میں دہشت گردوں کی مدد کر رہے تھے۔ملک اشفاق نصیر کو 2007 میں جموں و کشمیر پولیس میں بطور کانسٹیبل بھرتی کیا گیا تھا۔ اس کا بھائی ملک آصف نصیر لشکر طیبہ کا پاکستان سے تربیت یافتہ دہشت گرد تھا۔ وہ 2018 میں ایک مقابلے کے دوران سیکورٹی فورسز کے ہاتھوں مارا گیا تھا۔ تاہم ملک نے اپنی دہشت گردی کی سرگرمیاں جاری رکھی اور پولیس کانسٹیبل ہونے کی وجہ سے وہ کسی بھی شبہ سے بچنے میں کامیاب رہا۔ اس کا لشکر طیبہ کا تعلق ستمبر 2021 میں اس وقت بے نقاب ہوا جب جموں و کشمیر پولیس جموں خطے میں اسلحہ اور دھماکہ خیز مواد کی اسمگلنگ سے متعلق ایک کیس کی تحقیقات کر رہی تھی۔ ملک پولیس کانسٹیبل ہونے کے باوجود، لشکر طیبہ کو اسلحہ، دھماکہ خیز مواد اور منشیات گرانے میں مدد کر رہا تھا۔ محکمہ سکول ایجوکیشن میں استاد اعجاز احمد ایچ ایم کے لیے کام کر رہے تھے۔ اسے 2011 میں ایک استاد کے طور پر بھرتی کیا گیا تھا۔ وہ پونچھ کے علاقے میں ایچ ایم کا ایک قابل اعتماد دہشت گرد ساتھی بن گیا۔ وہ اسلحے، گولہ بارود اور منشیات کی سمگلنگ میں دہشت گرد تنظیم کی سرگرم مدد کر رہا تھا۔ اس کا نام نومبر 2023 میں اس وقت سامنے آیا جب پولیس نے معمول کی جانچ کے دوران اعجاز اور اس کے دوست کو گرفتار کیا۔ دونوں نے اعجاز کی ٹویوٹا فارچیونر میں اسلحہ، گولہ بارود اور ایچ ایم کے پوسٹرز اٹھا رکھے تھے۔ مزید تفتیش سے یہ بات سامنے آئی ہے کہ کھیپ اس کے ہینڈلر عابد رمضان شیخ کی ہدایت پر موصول ہوئی تھی، یہ کھیپ سیکورٹی فورسز اور عام شہریوں پر حملے کرنے کے لیے کشمیر میں سرگرم دہشت گردوں کو پہنچائی جانی تھی۔ تفتیش میں مزید انکشاف ہوا کہ اعجاز گزشتہ کئی سالوں سے اسلحہ اور گولہ بارود کی بھاری کھیپ حاصل کر رہا تھا اور اسے وادی کشمیر میں دہشت گردوں تک پہنچا رہا تھا۔منگل کو برطرف ایک اور سرکاری ملازم وسیم احمد خان ہیں، جو گورنمنٹ میڈیکل کالج سری نگر میں جونیئر اسسٹنٹ ہیں۔ انہیں 2007 میں محکمہ صحت اور میڈیکل ایجوکیشن نے تعینات کیا تھا۔ اگست 2018 میں ایچ ایم تنظیم کے ساتھ اس کے دہشت گردانہ روابط کا پردہ فاش ہوا تھا۔ سینئر حکام کے مطابق وسیم احمد خان اس سازش کے سازشیوں میں سے ایک پایا گیا تھا جس کی وجہ سے14 جون 2018 کوصحافی شجاعت بخاری اور ان کے دو پی ایس اوز کی ٹارگٹ کلنگ ہوئی۔”وہ لشکر طیبہ اور ایچ ایم کے ساتھ سرگرم عمل تھا، جنہوں نے پاکستان کی آئی ایس آئی کی ہدایت پر شجاعت بخاری کو قتل کیا تھا۔ اس نے سری نگر میں سیکرٹریٹ میں تعینات سی آر پی ایف اور جموں و کشمیر پولیس کے خلاف حملہ کرنے کے لیے دہشت گردوں کو اہم لاجسٹک مدد بھی فراہم کی تھی۔
