عظمیٰ نیوز سروس
ریاض //سعودی عرب نے اعلان کیا ہے کہ چاند نظر آنے کی تصدیق کے بعد سالانہ حج کا آغاز 4جون سے ہوگا۔یہ اعلان منگل کو مملکت کی سپریم کورٹ نے سرکاری سعودی پریس ایجنسی کے ذریعے جاری ایک بیان میں کیا۔پیر کو ایک نیوز کانفرنس میں سعودی وزیر حج توفیق الربیعہ نے کہا کہ دنیا بھر سے 10 لاکھ سے زائد عازمین پہلے ہی ملک پہنچ چکے ہیں۔گزشتہ سال 1.8 ملین افراد نے شرکت کی تھی۔ہندوستانی عازمین کی 2025 میں تعداد 1,22,518 ہے۔حج اسلام کے پانچ ستونوں میں سے ایک ہے اور اس کی استطاعت رکھنے والے تمام مسلمانوں کو کم از کم ایک بار ضرور کرنا فرض ہے۔حج ہر سال ذوالحجہ کے آٹھویں اور تیرہویں دنوں کے درمیان ہوتا ہے، جو اسلامی قمری کیلنڈر کا 12 واں اور آخری مہینہ ہے۔عبادت گزار چار دن کی تقریبات میں حصہ لیتے ہیں جس کا دوسرا دن ،عرفات پر اجتماعی بیرونی دعائوں کا آتا ہے، وہ پہاڑی جہاں پیغمبر اسلام ؐنے اپنا آخری خطبہ دیا تھا۔منگل کی رات نماز عشا ء کے بعد بیشتر حجاج منیٰ کا رخ کرتے ہیں لیکن زیادہ تر حجاج نماز فجر کے بعد لاکھوں کی تعداد میں منیٰ کا سفر کریں گے۔سعودی حکومت نے حجاج کرام کیلئے دنیا کی سب سے بڑی خیمہ بستی منیٰ میں سجا رکھی ہے جہاں لاکھوں عقیدت مندوں کے رہنے کا انتظام کیا گیا ہے۔
