سید اعجاز
ترال// ترال اور شوپیان کے مختلف بالائی علاقوں میں پیر کے روز قہر انگیز ژالہ باری ہوئی۔ ساڑے تین بجے کے قریب موسم نے کروٹ لی جس دوران بارشوں کے ساتھ ساتھ کچھ منٹ تک سخت ژالہ باری ہوئی، جس کے نتیجے میںفصلوں،میوہ جات اور سبزیوں کو شدید نقصان پہنچا ۔مقامی لوگوں نے بتایا بسمئی بٹھ نور،کار مولہ،برن پتھری ناگہ بل،ماحچھہامہ،دودھ مرگ، ناگہ پتھری ،زاری ہاڑسمیت دیگر کئی علاقوں میںشدید ژالہ باری ہوئی ۔مقامی لوگوں نے بتایا سب سے زیادہ نقصان بمسئی میں ہوا جبکہ ناگہ بل گائوں میں بھی شام تک اولے زمین پر جمع تھے۔کسانوں نے بتایا یہ اب تک کی تیسری بڑی ژالہ باری ہے ۔پیر کے روز ہی سہ پہر شوپیان کے کئی علاقوں میں پہلے آندھی چلی جس کیساتھ ہی ہلکی بارشیں ہوئیں۔ اسکے بعد ہنڈیو، ناگہ بل ،وڈی پورہ،الشی پورہ،داسو اور دیگر کئی ملحقہ علاقوں میں جم کر ژالہ باری ہوئی جو تقریباً 20منٹ تک جاری رہی۔ژالہ باری کا یہ عالم تھا کہ سڑکیں، مکانوں کے صحن اور کھیت کھلیانوں پر سفید چادر بچھ گئی۔ژالہ باری سے ایک وسیع علاقے میں میوہ باغات تباہ ہوئے۔ زمین پر پڑے اولے کئی گھنٹوں تک موجود تھے۔ادھر محکمہ موسمیات کے ایک ترجمان کے مطابق وادی میں اگلے چوبیس گھنٹوں کے دوران کہیں کہیں بارش ہونے کا امکان ہے۔انہوں نے کہا کہ3جون تک موسمی صورتحال دگر گوں رہنے کی امید ہے، اس دوران کہیں کہیں بارشیں ہوسکتی ہیں۔ڈائریکٹر ڈاکٹر مختار احمد نے کہا کہ 4 سے 8 جون تک موسم عام طور پر خشک رہنے کی توقع ہے۔تاہم، دوپہر کے بعد کچھ مقامات پر بارش یا موسلا دھار بارش کو خارج از امکان قرار نہیں دیا جا سکتا۔ انہوں نے کہا کہ 9 سے 10 جون تک بیشتر علاقوں میں خشک موسم جاری رہے گا ۔
