ایل جی کی کشمیر وومنز آرگنائزیشن کے اراکین سے بات چیت
سرینگر// لیفٹیننٹ گورنر منوج سنہانے راج بھون میں کشمیر وومنز آرگنائزیشن کے اراکین کے ساتھ بات چیت کی۔انہوں نے خواتین کو بااِختیار بنانے کے لئے وقف تنظیم سے وابستہ تمام افراد کو مبارکباد دی۔ اُنہوں نے کہا ’’ناری شکتی نے ہر شعبے میں نمایاں کارکردگی کا مظاہرہ کرتے ہوئے جموں و کشمیر کی ترقی اور خوشحالی میں اہم رول اَدا کیا ہے۔انہوں نے کہا ’’آج ہماری بیٹیاں نئی تاریخ رقم کر رہی ہیں۔ وہ مختلف شعبوں میں نمایاں کامیابیاں حاصل کر رہی ہیں اور رول ماڈل بن کر اُبھر رہی ہیں۔ وہ ہماری سماجی و اِقتصادی ترقی کی بنیاد اور تیز رفتار ترقی کی محرک قوت ہیں‘‘۔لیفٹیننٹ گورنر نے کہا کہ ہندوستانی آئین نے خواتین کو بلا امتیاز مساوی حقوق دئے ہیں۔انہوں نے مزید کہا ’’گزشتہ چند برسوں میں ہم نے خواتین کو بااِختیار بنانے کیلئے خصوصی پروگراموں اور اقدامات کے ذریعے اَپنی کوششیں تیز کی ہیں۔ ہمارا مقصد یہ ہے کہ ہماری بیٹیوں کو اہم شعبوں میں مزید مواقع فراہم کئے جائیں تاکہ وہ وِکست بھارت اور آتم نربھرجموں و کشمیر کی تعمیر میں مؤثر رول ادا کر سکیں‘‘۔لیفٹیننٹ گورنر نے کشمیر وومنز آرگنائزیشن کے تمام اراکین کو ان کی آئندہ کوششوں کے لئے نیک خواہشات کا اِظہار کیا۔ اس سے قبل وفد کے اَرکان نے لیفٹیننٹ گورنر کو اپنی مختلف سرگرمیوں سے آگاہ کیا جو خواتین کے بااختیار بنانے، سیاسی شمولیت اور کمیونٹی میں ان کی شرکت کو فروغ دینے کے لئے کی جا رہی ہیں۔
