عظمیٰ نیوز سروس
نئی دہلی//مرکزی وزیر داخلہ امت شاہ نے جمعہ کو کہا کہ آپریشن سندور نے اس حقیقت کو بے نقاب کر دیا ہے کہ ہندوستان میں دہشت گردی پوری طرح سے پاکستان کی سرپرستی میں ہے۔بی ایس ایف کی جانب سے 22ویں تقرری تقریب کے موقع پرلیکچر دیتے ہوئے انہوں نے کہا کہ سرحدی محافظ فورس نے آپریشن سندور کے دوران اپنی صلاحیتوں کا لوہا منوایا ہے اور پاکستان کی مذموم سرگرمیوں کی اجازت نہیں دی ہے۔وزیر داخلہ نے کہا کہ ہندوستانی مسلح افواج نے سب سے پہلے پاکستان میں ملی ٹینٹوں کے ٹھکانوں کو نشانہ بنایا لیکن یہ پاکستانی فوج تھی جس نے ہندوستان پر حملہ کرنے کی کوشش کا جواب دیا۔انہوں نے کہا کہ “ہم نے آپریشن سندور شروع کیا اور ملی ٹینٹوں کے نو کیمپوں کو تباہ کر دیا۔ انہوں نے کہا، “ہم نے نہ تو کسی پاکستانی فوجی تنصیب کو تباہ کیا اور نہ ہی ہم نے کبھی کسی ایئربیس کو نشانہ بنایا، ہم نے صرف اور صرف ملی ٹینٹوںکے کیمپوں کو تباہ کیا، جنہوں نے ہماری سرزمین پر جرائم کیے تھے۔”شاہ نے کہا، “ہم نے ملی ٹینٹوں کو نشانہ بنایا، لیکن پاکستان نے اسے اپنے اوپر لیا اور ثابت کر دیا کہ یہ پاکستان اسپانسر شدہ دہشت گردی ہے،” ۔وزیر داخلہ نے کہا کہ “انہوں نے ہمارے شہریوں کو نشانہ بنانے کی ہمت کی لیکن ہمارے فضائی دفاعی نظام کے سامنے وہ کامیاب نہیں ہو سکے۔ جس کے جواب میں، ہم نے ان کے فضائی اڈے کو نشانہ بنایا اور انہیں اپنی حملہ آور صلاحیت کا تعارف کرایا،” ۔انہوں نے کہا کہ 2014 میں بی جے پی کی حکومت بنی اور اوڑی میں فوجیوں پر حملہ کیا گیا۔انہوں نے کہا کہ ہم نے سرجیکل اسٹرائیک کی، اس کے بعد پلوامہ حملہ ہوا، جس کے جواب میں ہم نے ہوائی حملہ کیا، اب پہلگام میں بے گناہ سیاحوں کو ان کا مذہب پوچھنے پر مارا گیا، آپریشن سندور اس کا جواب تھا، دنیا اس کے لیے ہماری تعریف کر رہی ہے۔” شاہ نے کہا کہ یہ فورس اس بات کی ایک بہترین مثال ہے کہ کس طرح کوئی بھی حب الوطنی کی بنیاد پر تمام مشکلات پر قابو پا سکتا ہے اور دنیا کی بہترین قوت بن سکتا ہے۔بنگلہ دیش سمیت بین الاقوامی سرحدوں کی حفاظت میں بی ایس ایف کے کردار کا حوالہ دیتے ہوئے شاہ نے کہا کہ پڑوسی ملک کو اس کی تشکیل میں بی ایس ایف کے ذریعے ادا کیے گئے بڑے کردار کو نہیں بھولنا چاہیے۔انہوں نے کہا کہ پوری قوم کی طرف سے وہ 2000 سے زائد سرحدی محافظوں کو سلام پیش کرتے ہیں جنہوں نے 1965 سے 2025 تک بے خوفی کے ساتھ اپنے فرض کی راہ پر چلتے ہوئے اعلی قربانیاں دی ہیں۔شاہ نے آپریشن سندور کی کامیابی کا سہرا قیادت، انٹیلی جنس اور فوجی صلاحیت کے امتزاج کو دیا۔انہوں نے کہا، “آپریشن سندور وزیر اعظم کے پختہ سیاسی ارادے، ہماری معلومات اکٹھی کرنے والی ایجنسیوں کی درست انٹیلی جنس، اور فوج کی جانب سے حملہ کرنے کی صلاحیت کے شاندار مظاہرے کا نتیجہ ہے،جب یہ تینوں اکٹھے ہوتے ہیں، تو ہمیں آپریشن سندور ملتا ہے،” ۔
