اسلام آباد کو وہ پانی نہیں ملے گا جو بھارت کا حق ہے:مودی
یو این آئی
بیکانیر//وزیراعظم نریندر مودی نے آپریشن سندور کو ہندوستان کا ایک نیا اور رودر روپ قرار دیتے ہوئے کہا کہ ہماری بہنوں کا سندور مٹانے والوں کو مٹی میں ملا دیا گیا ہے اور جو ہندوستان کا خون بہاتے تھے، آج انہیں قطرہ قطرہ کا حساب چکانا پڑا ہے اور ہم اپنے عہد پر پورا اترے ہیں، اب پاکستان کے ساتھ نہ تجارت ہوگی نہ بات چیت۔ اگر بات ہوگی تو صرف پی او کے کے بارے میں ہوگی۔مودی جمعرات کو یہاں پلانہ میں منعقدہ جلسہ عام سے خطاب کر رہے تھے۔ انہوں نے کہا کہ ہندوستان نے واضح کردیا ہے کہ ہر ملی ٹینٹ حملے کی پاکستان کو بھاری قیمت ادا کرنی پڑے گی، یہ قیمت پاکستان کی فوج اور معیشت ادا کرے گی۔ انہوں نے کہا کہ پاکستان کو ہندوستان کے حق کا پانی نہیں ملے گا۔ اب ہندوستانیوں کے خون سے کھیلنا پاکستان کو مہنگا پڑے گا، یہ ہندوستان کا عزم ہے کہ دنیا کی کوئی طاقت اس عزم سے ہٹا نہیں سکتی۔ انہوں نے کہا کہ وکست بھارت کی تعمیر کے لیے سیکورٹی اور خوشحالی دونوں ضروری ہیں، یہ تب ہی ممکن ہوگا جب ہندوستان کا کونہ کونہ مضبوط ہوگا، آج کا یہ پروگرام ہندوستان کی تیز ترقی کی ایک مثال ہے۔انہوں نے کہا کہ ملی ٹینٹوں نے مذہب پوچھ کر ہماری بہنوں کی مانگ کا سندور اجاڑ دیا تھا، پہلگام میں گولیاں چلی تھیں، ان گولیوں سے 140 کروڑہم وطنوں کا سینہ چھلنی ہوا تھا۔ اس کے بعد ہر ہم وطن وںنے یکجہتی کے ساتھ عزم کیا تھا کہ ملی ٹینٹوں کو مٹی میں ملا دیں گے اور تصور سے بھی بڑی سزا دیں گے، آج ملک کی فوج کے شجاعت سے ہم سب اس عہد پر پورا اترے ہیں۔انہوں نے کہا کہ حکومت نے تینوں افواج کو کھلی چھوٹ دے دی تھی اور تینوں فوجوں نے مل کر ایسا چکرویوہ رچا کہ پاکستان کو گھٹنے ٹیکنے پر مجبور کر دیا گیا۔ انہوں نے کہا کہ 22 تاریخ کے حملے کے جواب میں ہم نے 22 منٹ میں دہشت گردی کے9سب سے بڑے ٹھکانوں کو تباہ کر دیا۔ دنیا نے یہ دیکھ لیا کہ جب سندور بارود بن جاتا ہے تو نتیجہ کیا ہوتا ہے۔ وزیراعظم نے کہا کہ اس مٹی کی قسم، میں ملک کو مٹنے نہیں دوں گا، میں ملک کو جھکنے نہیں دوں گا، جو سندور مٹانے نکلے تھے، انہیں مٹی میں ملا دیا ہے۔ انہوں نے کہا کہ جو ہندوستان کا خون بہاتے تھے، آج اس قطرہ قطرہ کا حساب چکانا پڑا ہے، جو اپنے ہتھیاروں پر غرور کرتے تھے، آج وہ ملبے کے ڈھیر میں دبے ہوئے ہیں۔ انہوں نے کہا کہ یہ بدلہ لینے کا کھیل نہیں، یہ انصاف کا نیا روپ ہے، یہ آپریشن سندور ہے، یہ صرف غصہ نہیں، یہ پورے ہندوستان کا روپ ہے، یہ ہندوستان کا نیا روپ ہے۔انہوں نے کہا کہ پہلے گھر میں گھس کر وار کیا تھا، اب سیدھا سینے پر حملہ کیا ہے۔ دہشت گردی کا سر کچلنے کی یہی ریت ہے۔ یہی بات ہے، نیا ہندوستان ہے۔ انہوں نے کہا کہ آپریشن سندور نے دہشت گردی سے نمٹنے کے لیے تین اصول طے کر دیے ہیں۔ پہلا، ہندوستان پر دہشت گرد حملہ ہوا تو اس کا سخت جواب ملے گا۔ دن اور وقت ہماری فوجیں طے کریں گی اور شرائط بھی ہماری ہوں گی۔ دوسرا، ایٹم کی دھمکیوں سے ہندوستان ڈرنے والا نہیں۔ تیسرا، ملی ٹینٹوں کے سرغنوں اوران کے سرپرستوں کو الگ الگ نہیں دیکھا جائے گا اور انہیں ایک ہی سمجھا جائے گا۔انہوں نے کہا کہ اگر پاکستان دہشت گردوں کو برآمد کرتا رہا تو اسے ایک ایک پائی سے محروم کر دیا جائے گا، پاکستان کو وہ پانی نہیں ملے گا جو بھارت کا حق ہے، بھارتیوں کے خون سے کھیلنا پاکستان کو مہنگا پڑے گا، یہ بھارت کا عزم ہے، اور دنیا کی کوئی طاقت ہمیں اس سے دور نہیں کر سکتی، سلامتی اور استحکام کے لیے یہ دونوں عزم ضروری ہیں۔ وزیراعظم نے کہاکہ پاکستان بھارت سے براہ راست جنگ کبھی نہیں جیت سکتا۔ جب بھی براہ راست جنگ ہوتی ہے تو پاکستان کو شکست کا سامنا کرنا پڑتا ہے۔ اسی لئے پاکستان نے دہشت گردی کو اپنا جنگی ہتھیار بنا لیا ہے۔
