عظمیٰ نیوز سروس
سرینگر//سرینگر میں محکمہ موسمیات نے آنے والے دنوں میں جموں و کشمیر میں گرمی کی شدید لہر کی پیش گوئی کی ہے۔عہدیداروں نے خبردار کیا کہ حاملہ خواتین، چھوٹے بچے، بوڑھے اور پہلے سے موجود صحت کی حالتوں میں مبتلا افراد کو سب سے زیادہ خطرے کا سامنا ہے کیونکہ جموں اور کشمیر دونوں ڈویژنوں میں دن کے وقت درجہ حرارت میں تیزی سے اضافہ جاری ہے۔تاہم، ہفتے کے آخر میں کچھ راحت متوقع ہے۔محکمہ نے اتوار کی شام سے الگ تھلگ علاقوں میں ہلکی بارش اور گرج چمک کے ساتھ بارش کی پیش گوئی کی ہے۔ توقع ہے کہ گیلامرحلہ پیر تک کچھ حصوں میں رہے گا، جس سے بڑھتے ہوئے درجہ حرارت سے عارضی ریلیف ملے گا۔ محکمہ موسمیات نے کہا ہے کہ سرینگر میں اتوار کو زیادہ سے زیادہ درجہ حرارت 31.5ریکارڈ کیا گیا جبکہ قاضی گنڈ میں 32.0ڈگری سیلشیس رہا۔جموں میں شدید گرمی کی لہر جاری ہے جہاں اتوار کو درجہ حرارت 41.0 درج کیا گیا۔پیر کو شدید گرمی پڑنے کا امکان ظاہر کیا گیا ہے۔پہلگام میں 27.0، کپوارہ میں 29.0، کوکر ناگ میں 30.0اور گلمرگ میں 22.2درجہ حرارت ریکارڈ کیا گیا۔جموں کے بانہال میں 30.4، بٹوٹ میں 30.9، بھدرواہ میں 30.4اور کٹرا میں 37.0درج کیا گیا۔لیہہ میں درجہ حرارت 19.0رہا۔
