نشاط واقعہ: فوری کارروائی کے نتیجے میں تمام ملزمان گرفتار: پولیس

عظمیٰ ویب ڈیسک
سری نگر/پولیس کا کہنا ہے کہ فوری کارروائی کے نتیجے میں سری نگر میں جنسی زیادتی کے کیس میں ملوث چاروں ملزموں کو گرفتار کیا گیا ہے۔ایک پولیس ترجمان نے اپنے ایک بیان میں کہا کہ سری نگر پولیس نے واٹر ورکس روڈ، نشاط کے قریب کچھ افراد کے ایک گروپ کی طرف سے ایک خاتون (نام ظاہر نہیں کیا گیا) پر جنسی زیادتی کی کوشش کی اطلاع ملنے پر فوری کارروائی انجام دی۔
انہوں نے کہا کہ متاثرہ خاتون کو شدید چوٹیں آئی تھیں اور اس کو ہسپتال منتقل کیا گیا جہاں اس کو مردہ قرار دے دیا گیا۔بیان میں کہا گیا کہ واقعے کے بعد، متعلقہ دفعات کے تحت ایف آئی آر نمبر 35/2025 درج کی گئی اور اس سلسلے میں فوری طور پر تحقیقات شروع کی گئیں۔انہوں نے کہا کہ تفتیش کے دوران چار ملزموں کی شناخت کی گئی اور ان کو گرفتار کیا گیا۔
گرفتار شدگان میں سہیل بشیر بٹ ولد بشیر احمد ساکن آشم سمبل، عادل علی بٹ ولد علی محمد ساکن زیٹھ یار نشاط، فردوس احمد راتھر ساکن غلام احمد ساکن زیٹھ ہار نشاط ار سہیل افضل بٹ ولد محمد افضل ساکن پہلو برین کے طور پر کی گئی ہے۔پولیس ترجمان نے بتایا کہ ایک تیز اور فیصلہ کن کارروائی میں تمام ملزموں کو گرفتار کر لیا گیا ہے۔انہوں نے کہا کہ اس سلسلے میں مزید تحقیقات جاری ہیں۔
ان کا کہنا ہے کہ سری نگر پولیس قانون کی حکمرانی کو برقرار رکھنے، معاشرے سے جرائم کو ختم کرنے اور ہر شہری کی حفاظت اور عزت کو یقینی بنانے کے اپنے عزم میں ثابت قدم ہے۔قابل ذکر ہے کہ سری نگر کے نشاط علاقے میں اتوار کو ایک خانہ بدوش خاتون کی لاش مشتبہ حالت میں بر آمد کی گئی مبینہ طور پر اس کو جنسی زیادتی اور تشدد کا نشانہ بنایا گیا تھا۔