جاوید اقبال
مینڈھر //عوام اور انتظامیہ کے درمیان روابط کو مضبوط بنانے کی ایک اہم کوشش کے تحت، ڈپٹی کمشنر پونچھ وکاس کندل (آئی اے ایس) اور سینئر سپرنٹنڈنٹ آف پولیس پونچھ شفقت حسین (جے کے پی ایس) نے سب ڈویژن مینڈھر کے ڈاک بنگلہ میں ایک انٹریکٹو سیشن کا انعقاد کیا۔اس ملاقات میں سول سوسائٹی، مذہبی رہنماؤں، سیاسی نمائندوں اور سماجی کارکنان نے بھرپور شرکت کی۔ اجلاس کا مقصد عوام، پولیس اور انتظامیہ کے درمیان اعتماد اور ہم آہنگی کو فروغ دینا اور علاقے کے شہری و ترقیاتی مسائل پر مشاورت کرنا تھا۔اجلاس میں عوامی خدمات کی فراہمی، قانون و نظم کی صورتحال، ٹریفک مسائل، نوجوانوں کی شمولیت، اور بنیادی ڈھانچے کی ترقی جیسے موضوعات پر گفتگو ہوئی۔ڈی سی پونچھ نے کہا کہ ایسی نشستیں عوامی شراکت داری پر مبنی حکمرانی کو مضبوط کرتی ہیں اور عوامی تعاون امن، اتحاد اور ترقی کے لئے لازمی ہے۔ایس ایس پی پونچھ شفقت حسین نے مینڈھر جیسے حساس علاقے میں پرامن ماحول کو برقرار رکھنے کی اہمیت پر زور دیا۔ انہوں نے کہا کہ کمیونٹی کی شرکت معاشرتی ہم آہنگی کے لئے ناگزیر ہے اور بااثر شخصیات کو چاہئے کہ وہ غلط معلومات کا مقابلہ کریں اور فرقہ وارانہ ہم آہنگی کو فروغ دیں۔شرکاء نے اس موقع پر اپنے مسائل اور تجاویز کھلے دل سے پیش کیں جنہیں انتظامیہ نے سنجیدگی سے سنا اور فوری اقدامات کا یقین دلایا۔
