رمیش کیسر
نوشہرہ//نوشہرہ سیکٹر میں ایک بار پھر پاکستانی فوج کی جانب سے جنگ بندی معاہدے کی خلاف ورزی کی گئی ہے۔ دفاعی ذرائع کے مطابق جمعرات اور جمعہ کی درمیانی شب پاکستانی افواج نے نوشہرہ کے اگلی چوکیوں پر چھوٹے اور خود کار ہتھیاروں سے بلا اشتعال فائرنگ کی، جس کا بھارتی فوج نے بھی مؤثر اور معقول جواب دیا۔ذرائع نے بتایا کہ پاکستانی فوج کی یہ کارروائی رات دیر گئے اس وقت عمل میں لائی گئی جب اگلی پوسٹوں پر تعینات بھارتی فوجی اہلکار معمول کی گشت پر تھے۔ فائرنگ کا مقصد بھارتی چوکیوں کو نشانہ بنانا تھا، تاہم مستعد بھارتی افواج نے نہ صرف اپنی پوزیشن سنبھالی بلکہ دشمن کو منہ توڑ جواب دیتے ہوئے فائرنگ کو خاموش کروایا۔خوش قسمتی سے اس واقعے میں بھارتی فوج کو کسی قسم کا جانی یا مالی نقصان نہیں پہنچا ہے۔ دفاعی ذرائع کا کہنا ہے کہ پاکستانی افواج کی یہ حرکت جنگ بندی معاہدے کی کھلی خلاف ورزی ہے، جو سرحد پر امن و سکون کو متاثر کرنے کی کوشش ہے۔واضح رہے کہ گزشتہ کچھ عرصے سے نوشہرہ اور پونچھ سیکٹر میں پاکستان کی جانب سے بارہا جنگ بندی کی خلاف ورزیاں دیکھنے میں آئی ہیں، جن میں بلا اشتعال فائرنگ اور گولہ باری شامل ہے۔ ان کارروائیوں کا مقصد مقامی آبادی میں خوف و ہراس پھیلانا اور سرحدی علاقوں میں عدم استحکام پیدا کرنا معلوم ہوتا ہے۔بھارتی فوج نے واضح کیا ہے کہ سرحد کی حفاظت کے لئے ہر ممکن اقدام کیا جائے گا اور کسی بھی جارحیت کا مؤثر جواب دیا جاتا رہے گا۔ عوام کو افواہوں سے بچنے اور فوج کے ساتھ مکمل تعاون کی تلقین کی گئی ہے۔
