عظمیٰ نیوز سروس
نئی دہلی//سپریم کورٹ نے جمعرات کو پہلگام میں 22 اپریل کو ہونے والے دہشت گردانہ حملے کی تحقیقات کے لیے سپریم کورٹ کے ایک ریٹائرڈ جج کی سربراہی میں تحقیقاتی پینل کی تشکیل کی مانگ کرنے والی عرضی پر غور کرنے سے انکار کر دیا۔جسٹس سوریہ کانت کی سربراہی والی بنچ نے سپریم کورٹ میں اس طرح کی عرضی داخل کرنے پر پی آئی ایل کے مدعی پر سخت سر زنش کی۔ بنچ ،جس میں جسٹس این کے سنگھ بھی شامل تھے،نے کہا”ایسی پی آئی ایل دائر کرنے سے پہلے ذمہ دار بنیں، ہائی کورٹ یا سپریم کورٹ کے ریٹائرڈ جج کب سے تفتیش کے ماہر بن گئے ہیں؟ ہم (ججوں)نے تفتیش کی مہارت کب سے حاصل کی ہے؟ ہم صرف تنازعات کا فیصلہ کرتے ہیں، براہ کرم یہ مطالبہ نہ کریں کہ ایک ریٹائرڈ جج کی نگرانی میں تحقیقات کی جائے۔اس میں مزید کہا گیا، “یہ وہ اہم گھڑی ہے جب ملک کا ہر شہری دہشت گردی سے لڑنے کے لیے ہاتھ ملا رہا ہے،کوئی ایسا مطالبہ نہ کریں جس سے ہماری افواج کے حوصلے پست ہوں، یہ ہمارے لیے قابل قبول نہیں ہے،معاملے کی حساسیت کو دیکھیں۔”دہشت گردانہ حملے کی تحقیقات کی عرضی پر غور کرنے کے لیے عدالت کے بے اعتنائی کو محسوس کرتے ہوئے، پی آئی ایل کے مدعی نے جموں و کشمیر کے طلبہ کا مسئلہ یونین کے زیر انتظام علاقے سے باہر پڑھتے ہوئے اٹھایا۔اس پر عدالت عظمیٰ نے کہا کہ ہم کچھ نہیں بتائیں گے، آپ جہاں بھی جانا چاہتے ہیں چلے جائیں، ہمیں حکم دینے کے لیے مت کہو! کیا آپ کو اس درخواست کے بارے میں یقین ہے جو آپ نے پٹیشن میں کی ہے؟ آپ ہمیں یہ سب چیزیں (فائل)رات کو پڑھنے پر مجبور کرتے ہیں، اور پھر آپ اپنی کی گئی درخواست کو بھول جاتے ہیں۔تاہم، جسٹس کانت کی زیرقیادت بنچ نے تجویز کیا کہ مرکز کے زیر انتظام علاقے سے باہر پڑھنے والے جموں و کشمیر کے طلبا کے سلسلے میں دائرہ اختیار ہائی کورٹ کا ہے۔بالآخر، عدالت عظمی نے عرضی گزار کو PIL واپس لینے کی اجازت دی لیکن طلبا کی وجہ(اگر کوئی ہے) کے سلسلے میں متعلقہ ہائی کورٹ سے رجوع کرنے کی آزادی دی۔یہ درخواست ایڈوکیٹ فتح کمار ساہو اور وکی کمار اور ایک اور شخص جنید محمد جنید نے دائر کی تھی۔
