وزیر اعظم کی ’من کی بات‘ | انصاف ہو کر رہے گا ہر ہندوستانی کا خون ابل پڑا، کشمیر میں امن خراب کرنے کی کوشش: نریندر مودی

عظمیٰ نیوز سروس

نئی دہلی//وزیر اعظم نریندر مودی نے اتوار کو کہا کہ پہلگام ملی ٹینٹ حملے کے متاثرین کو یقینی طور پر انصاف ملے گا، اس بات پر زور دیتے ہوئے کہ 26 شہریوں کے قتل کے پیچھے دہشت گردوں اور سازش کرنے والوں کو سخت ترین سزا دی جائے گی۔انہوں نے اپنے ماہانہ’ من کی بات‘ میں کہا کہ حملے کی تصویریں دیکھ کر ہر ہندوستانی کا خون کھول رہا ہے۔مودی نے کہا کہ دہشت گردی کے خلاف اس جنگ میں ملک کا اتحاد اور اس کے 140 کروڑ شہریوں کی یکجہتی اس کی سب سے بڑی طاقت ہے۔انہوں نے کہا کہ یہ اتحاد دہشت گردی کے خلاف ہماری فیصلہ کن جنگ کی بنیاد ہے۔وزیر اعظم نے کہا کہ کشمیر کے مشہور سیاحتی قصبے میں حملہ دہشت گردی کے سرپرستوں کی مایوسی اور بزدلی کی عکاسی کرتا ہے، ، ایسے وقت میں جب وادی میں امن لوٹ رہا تھا اور اس کے اسکولوں اور کالجوں میں رونق تھی۔انہوں نے کہا کہ تعمیراتی کام نے بے مثال رفتار حاصل کی ہے، جمہوریت مضبوط ہو رہی ہے، سیاحوں کی تعداد میں ریکارڈ اضافہ ہو رہا ہے، لوگوں کی آمدنی میں اضافہ ہو رہا ہے اور نوجوانوں کے لیے نئے مواقع پیدا ہو رہے ہیں۔مودی نے کہا، “ملک اور جموں و کشمیر کے دشمنوں کو یہ پسند نہیں آیا، دہشت گرد اور دہشت گردی کے ماسٹر مائنڈ چاہتے ہیں کہ کشمیر کو پھر سے تباہ کیا جائے اور اسی لیے انہوں نے اتنی بڑی سازش کو انجام دیا” ۔وزیر اعظم نے کہا کہ ان کا دل کشمیر میں شہریوں پر طویل عرصے میں ہوئے سب سے بڑے حملے پر شدید غمزدہ ہے، اور کہا کہ اس واقعے نے ملک کے ہر شہری کو تکلیف دی ہے۔انہوں نے کہا کہ ہر ہندوستانی متاثرہ خاندانوں کے لیے گہری ہمدردی محسوس کر رہا ہے، چاہے وہ کسی بھی ریاست سے تعلق رکھتا ہو یا کون سی زبان بولتا ہو۔مودی نے کہا، “میں دہشت گردانہ حملے کی تصویریں دیکھ کر محسوس کر سکتا ہوں کہ ہر ہندوستانی کا خون کھول رہا ہے،میں ایک بار پھر متاثرہ خاندانوں کو یقین دلاتا ہوں کہ انہیں انصاف ملے گا، اور ضرور ملے گا۔ اس حملے کے مجرموں اور سازش کرنے والوں کو سخت ترین سزا دی جائے گی۔”انہوں نے مزید کہا کہ “ہمیں ملک کے سامنے اس چیلنج کا مقابلہ کرنے کے لیے اپنے عزم کو مضبوط کرنا ہوگا، ہمیں بحیثیت قوم مضبوط عزم کا مظاہرہ کرنا ہوگا۔ آج دنیا دیکھ رہی ہے کہ اس دہشت گردانہ حملے کے بعد پورا ملک ایک آواز میں بول رہا ہے۔”وزیر اعظم نے کہا کہ اس حملے کی پوری دنیا سے مذمت کی گئی ہے، یہ نوٹ کرتے ہوئے کہ بین الاقوامی رہنمائوں نے انہیں فون کیا، خطوط لکھے اور پیغامات بھیجے۔ انہوں نے کہا کہ ہر کسی نے اس گھنانے دہشت گردانہ حملے کی شدید مذمت کی ہے، اور انہوں نے مرنے والوں کے اہل خانہ سے تعزیت کا اظہار کیا ہے۔مودی نے کہا کہ پوری دنیا دہشت گردی کے خلاف ہماری لڑائی میں 140 کروڑ ہندوستانیوں کے ساتھ کھڑی ہے۔