یو این آئی
جدہ//سعودی عرب کے اپنے دو روزہ دورے سے قبل وزیر اعظم نریندر مودی نے دونوں ممالک کے درمیان بڑھتے ہوئے تعلقات کے ’’لامحدود امکانات‘‘ کے بارے میں بات کرتے ہوئے کہا ہے کہ عدم استحکام سے بھری دنیا میں دونوں ممالک کے تعلقات استحکام کے ایک مضبوط ستون کی طرح کھڑے ہیں۔ مودی نے عرب نیوز کو انٹرویو دیتے ہوئے یہ بات کہی۔ قابل ذکر ہے کہ وزیراعظم آج سے سعودی عرب کے دو روزہ دورے پر ہیں۔ 2016اور 2019 کے بعد یہ ان کا سعودی عرب کا تیسرا دورہ ہے۔سعودی عرب کو ایک قابل بھروسہ اور حکمت عملی کے لحاظ سے اہم پارٹنر کے طور پر بیان کرتے ہوئے مودی نے اس بات پر زور دیا کہ سال 2019 سے ‘اسٹریٹجک پارٹنر کونسل کی تشکیل کے بعد سے دونوں ممالک کے درمیان باہمی تعلقات میں نمایاں طور پر توسیع ہوئی ہے۔وزیر اعظم نے کہا، ہماری شراکت میں لامحدود امکانات ہیں۔ ہمارے تعلقات عدم استحکام سے بھری دنیا میں استحکام کے ستون کی طرح مضبوط ہیں۔ انہوں نے سعودی ولی عہد اور وزیر اعظم محمد بن سلمان کی قیادت کی تعریف کی اور انہیں دونوں ممالک کے درمیان مضبوط تعلقات کا حامی اور “ویژنری” قرار دیا۔ انہوں نے کہا کہ سعودی شہزادے نے اپنے ‘وژن 2030’ پر پوری دنیا میں پذیرائی حاصل کی ہے۔وزیراعظم نے کہا کہ جب بھی میں ان سے ملا ہوں ولی عہد نے میرے اوپر ایک تاثر چھوڑا ہے۔ ان کی بصیرت، دور اندیشی اور عوام کی امنگوں کو پورا کرنے کا جذبہ قابل تعریف ہے۔ دونوں ممالک کے مشترکہ اقتصادی عزائم کی طرف اشارہ کرتے ہوئے وزیراعظم نے کہا کہ عالمی چیلنجوں کے باوجود دونوں ممالک کے درمیان توانائی، زراعت اور کھاد جیسے اہم شعبوں میں تجارتی تعلقات میں اضافہ ہوا ہے۔ مودی نے خاص طورپر ‘گرین ہائیڈروجن اور ٹیکنالوجی جیسے ابھرتے ہوئے شعبوں میں سعودی عرب اور ہندوستان کے تجارتی تعلقات کے گہرے انضمام پر زور دیتے ہوئے کہا کہ ہندوستانی کمپنیاں سعودی عرب میں مختلف شعبوں میں گہرائی تک رسائی حاصل کرنے میں کامیاب ہوئی ہیں۔مودی نے سعودی عرب کو ورلڈ ایکسو 2030 اور فیفا ورلڈ کپ 2034 کی میزبانی حاصل کرنے پر مبارک باد دی اوراسے دوہری کامیابی قرار دیا۔ وزیراعظم نے دونوں ممالک کے درمیان بڑھتے ہوئے دفاعی تعاون اور دونوں ممالک کی فوجوں کے درمیان مشترکہ فوجی مشقوں کو بڑھتے ہوئے اسٹریٹجک اعتماد کی علامت قرار دیا۔ ستمبر 2023 میں جی 20 سربراہی اجلاس کے دوران شروع ہونے والے انڈیا ویسٹ ایشیا یورپ اکنامک کوریڈور (آئی ایم ای ای سی) پر بات کرتے ہوئے مودی نے کہا کہ یہ منصوبہ پورے خطے میں ترقی، تجارت اور رابطے کے لیے بہت اہم ہے۔ وزیر اعظم نے مزید کہا’’2014سے ہمارے تعلقات نئی بلندیوں کو چھو رہے ہیں، مجھے یاد ہے جب مجھے 2016 میں شاہ سلمان نے ‘دی آرڈر آف کنگ عبدالعزیز سے نوازا تھا۔ میں سچ میں سمجھتا ہوں کہ یہ دونوں ممالک کے تعلقات کے لیے ‘امید بھرا وقت ہے اور میں یہ کہوں گا کہ سعودی قیادت نے اس شراکت داری کو مضبوط بنانے میں اہم کردار ادا کیا ہے‘‘۔
امریکی نائب صدر نے عظیم لیڈر قرار دیا
یو این آئی
نئی دہلی//امریکی نائب صدر جے ڈی وینس نے وزیر اعظم نریندر مودی سے ملاقات پر خوشی کا اظہار کرتے ہوئے انہیں ایک عظیم لیڈر قرار دیا ہے۔ وینس نے پیر کو کہا کہ وہ ہندوستان کے ساتھ دوستی اور تعاون کو مزید مضبوط کرنے کی سمت کام کرنے کے منتظر ہیں۔ ایکس پر ایک پوسٹ میں امریکی نائب صدر نے گزشتہ شام کہا کہ وہ دو طرفہ دوستی اور تعاون کو مضبوط بنانے کے منتظر ہیں۔ انہوں نے کہا’’آج شام وزیر اعظم مودی سے ملنا اعزاز کی بات ہے۔ وہ ایک عظیم رہنما ہیں اور وہ میرے خاندان کے ساتھ بہت مہربان تھے۔ میں ہندوستان کے لوگوں کے ساتھ ہماری دوستی اور تعاون کو مضبوط کرنے کے لیے صدر ٹرمپ کی قیادت میں کام کرنے کا منتظر ہوں‘‘۔ وینس نے یہ بات مودی کی طرف سے ایکس پر کی گئی پوسٹ کے جواب میں لکھی۔ ایک پوسٹ میں وزیر اعظم نے کہا’’میں نئی دہلی میں امریکی نائب صدر جے ڈی وینس اور ان کے خاندان کا خیرمقدم کرتے ہوئے بہت خوش ہوں۔ میں نے اپنے دورہ امریکہ کے بعد سے ہونے والی تیز رفتار پیش رفت کا جائزہ لیا اور صدر ٹرمپ سے ملاقات کی۔ ہم تجارت، ٹیکنالوجی، دفاع، توانائی اور عوام سے عوام کے تبادلے سمیت باہمی فائدہ مند تعاون کے لیے پابند عہد ہیں۔ 21ویں صدی ہمارے لوگوں اور دنیا کے بہتر مستقبل کے لیے اہم ہے‘‘۔
