عظمیٰ نیوزسروس
جموں//چیف سیکرٹری اَتل ڈلو نے جموں و کشمیر رورل لائیولی ہوڈز مشن کو مضبوط بنانے کی طرف ایک اہم پیش رفت میں معروف قومی اِداروں کدوم باشری نیشنل ریسورس آرگنائزیشن اور آرگنائزیشن فار دی مینجمنٹ آف پوورٹی اینڈ لائیولی ہوڈ امپرومنٹ سوسائٹی کے نمائندوں کے ساتھ اعلیٰ سطحی میٹنگ کی صدارت کی۔ اِس میٹنگ کا مقصد اِدارہ جاتی معاونت، عملے کی تربیت اور جموں و کشمیر کے سیلف ہیلپ گروپوں کو بااِختیار بنانے کے لئے قومی مہارت سے فائدہ اٹھانا تھا۔اِس موقعہ پرچیف سیکرٹری نے دونوں اداروں کے اپنے اپنے جغرافیائی علاقوں میں انقلابی کردار کو سراہتے ہوئے انہیں اپنے انسانی وسائل اور تکنیکی معلومات کو جموںوکشمیر تک پہنچانے کی دعوت دی۔اُنہوں نے جے کے آر ایل ایم عملے کی بھرپورتربیت اور جموںوکشمیر یوٹی میں خواتین کو بااختیار بنانے اور غربت کے خاتمے میں اس کی صلاحیت کو پوری طرح سے بروئے کار لانے کے لئے مشن کی سٹریٹجک تبدیلی کی ضرورت پر زور دیا۔او ایم پی ایل آئی ایس نے اپنی 1995سے جاری کامیاب جدوجہد کی تفصیلی پیشکش دی جس میں بتایا گیا کہ کس طرح اس ادارے نے خواتین کو مالی طور پر بااِختیار بنا کر غربت سے آزاد ہونے کے قابل بنایا ہے۔ اب تک ادارے کی مدد سے ایس ایچ جیز نے 73کروڑ روپے کی بچت اور 58کروڑ روپے کا منافع حاصل کیا ہے۔ واضح رہے کہ 478کروڑ روپے کے قرضے، 4.18کروڑ روپے کی کمیونٹی انوسٹمنٹ فنڈ (سی آئی ایف) اور 15.28 کروڑ روپے کے سافٹ لونز فراہم کئے گئے جن سے زائد اَز 6,500کنبے مستفید ہوئے۔ایک تاریخی فیصلے میںاو ایم پی ایل آئی ایس نے جموں و کشمیر میں ایک ایک بلاک کو پائلٹ بنیاد وںپر اَپنانے اتفاق کیا ۔ اِس اَقدام میں فیلڈ سٹاف کی تربیت، کلسٹر ماڈل ٹریننگ سینٹرز (سی ایم ٹی سیز) کو مضبوط بنانے اور ایس ایچ جی ممبران کی رہنمائی شامل ہے تاکہ وہ اَپنے روزگار کو بہتر نتائج کی طرف لے جا سکیں۔کدوم باشری این آر او جو ملک کی 22 ریاستوں اور یوٹیزمیں کمیونٹی کی قیادت میں کام کرنے والے ماڈلز کے لئے جانا جاتا ہے، نے جے کے آر ایل ایم کے لئے ایک موزوں منصوبہ پیش کیا۔ اس میں مارکیٹ سے جُڑے ماڈلز، برانڈنگ، پیکیجنگ اور ڈیجیٹل مارکیٹنگ کے ذریعے ایس ایچ جیز کی مصنوعات کو قومی و عالمی منڈیوں تک رسائی دینے کی تجاویز شامل تھیں۔اُنہوں نے ’’اِنڈیا فوڈ کورٹ‘‘ ماڈل سے متاثر ہو کر کمیونٹی کی زیر اِنتظام فوڈ سروس اَنٹرپرائزز کے قیام کی تجویز پیش کی جو دیہی روزگار کو سیاحت اورہوٹلنگ کے شعبے سے جوڑنے میں معاون ہو گا۔عملدرآمد کی مجموعی حکمت عملی میں کلاؤڈ بیسڈ، تین سطحی نگرانی کا نظام شامل ہے تاکہ نتائج پر نظر رکھی جا سکے اور جواب دہی کو یقینی بنایا جا سکے۔ پہلے سال کے دوران 20ماڈل انٹرپرائزز کے قیام اور جے کے آر ایل ایم کے عملے کے لئے مقامی تربیتی ماڈیولز پر مشتمل ایک جامع آپریشنل مینوئل تیار کرنے کا بھی منصوبہ ہے۔چیف سیکرٹری نے دونوں اداروں کی تجاویز کو سراہتے ہوئے کہا کہ جموں و کشمیر حکومت، بااختیار اور خودکفیل دیہی کمیونٹیوںکی تشکیل کے لئے اِختراعی اور تجربہ پر مبنی اشتراک کو فروغ دے رہی ہے۔
