کشمیر مقیم اپوزیشن نے اسپیکر کے خلاف تحریکِ عدم اعتماد جمع کرائی،سب کی نظر یں این سی کے مؤقف پر مرکوز

عظمیٰ ویب ڈیسک
سرینگر/اپوزیشن کی جماعتوں، پیپلز ڈیموکریٹک پارٹی اور پیپلز کانفرنس نے اسپیکر عبد الرحیم راتھر کے خلاف تحریکِ عدم اعتماد جمع کرائی ہے۔ یہ اقدام وقف (ترمیمی) بل 2025 پر بحث کی اجازت نہ دینے پر اٹھایا گیا ہے، جس پر ایوان میں شدید ناراضگی پائی جا رہی ہے۔
ذرائع کے مطابق، پیپلز کانفرنس کے صدر سجاد غنی لون اور پی ڈی پی کے اراکین اسمبلی وحید الرحمٰن پرہ، میر محمد فیاض اور رفیق احمد نائیک کی جانب سے جمع کرائے گئے نوٹس میں اسپیکر کو عہدے سے ہٹانے کا مطالبہ کیا گیا ہے۔
درخواست میں کہا گیا ہے، یہ فیصلہ ایوان کے اندر اسپیکر کی کارروائیوں پر پائی جانے والی شدید ناراضگی کا نتیجہ ہے، جن میں اپوزیشن کی جانب سے لائی گئی التواء کی تحریک پر بحث سے انکار اور ایک قرارداد کو قبول نہ کرنا شامل ہیں۔
مزید کہا گیا ہے، اس قسم کے اقدامات ایوان کی جمہوری روایات اور اصولوں کو نقصان پہنچاتے ہیں، جس کے باعث اس معاملے پر ایک باضابطہ قرارداد لائی جا رہی ہے۔
اب جبکہ اپوزیشن نے اسپیکر کے خلاف تحریکِ عدم اعتماد پیش کر دی ہے، تمام نظریں نیشنل کانفرنس کے مؤقف پر مرکوز ہیں، خاص طور پر اس وجہ سے کہ وہ بھی وقف (ترمیمی) بل 2025 پر بحث کی اجازت نہ دینے پر احتجاج کر رہے ہیں۔