کٹھوعہ انکائونٹر کی جگہ سے ملی ٹینٹ فرار اسلحہ وگولہ بارود پیچھے چھوڑ گئے، کمانڈوز کی خدما ت حاصل

عظمیٰ نیوز سروس

کٹھوعہ //کٹھوعہ کے سنیال، ہیرا نگر علاقے میں تصادم کے مقام سے ممکنہ طور پر فرار ہونے والے ملی ٹینٹ ہتھیار، گولہ بارود اور دیگر سامان چھوڑ گئے ہیں۔ برآمد شدہ اشیا میں چار رائفل میگزین، چار آئی ڈی پیک، بلٹ پروف جیکٹس، جوتوں کے متعدد جوڑے، سلیپنگ بیگ اور ٹریک سوٹ شامل ہیں۔سیکیورٹی فورسز فرار ہونے والے ملی ٹینٹوں کا سراغ لگانے کے لیے علاقے کو گھیرے میں لے رہے ہیں اور جاری تفتیش کے حصے کے طور پر برآمد شدہ مواد کی جانچ کر رہے ہیں۔اس تصادم کے نتیجے میں پہلے 7 سالہ بچی زخمی ہوئی تھی، جب کہ 4-5 بھاری ہتھیاروں سے لیس ملی ٹینٹ یہاں موجود تھے۔حکام نے بتایا کہ آپریشن اتوار کی شام ہیرا نگر سیکٹر میں شروع کیا گیا تھا اور اسے پیر کی صبح کمانڈوز، ڈرونز اور سنیففر کتوں کی اضافی تعیناتی کے ساتھ تیز کیا گیا۔ انہوں نے مزید کہا کہ بعد میں ایک ہیلی کاپٹر بھی تعینات کیا گیا۔حکام نے بتایا کہ پاکستان کے ساتھ بین الاقوامی سرحد سے تقریبا پانچ کلومیٹر دور سانیال گائوں کی ایک نرسری میں ڈھوک کے اندر ملی ٹینٹوں کی موجودگی کے بارے میں خفیہ اطلاع ملی۔انہوں نے بتایا کہ چھپے ہوئے ملی ٹینٹوں نے پولیس پارٹی پر فائرنگ کی جس کے نتیجے میں شدید فائرنگ کا تبادلہ ہوا جو آدھے گھنٹے سے زائد جاری رہی۔پولیس کے ڈائریکٹر جنرل نلین پربھات نے آپریشن کی ہدایت دی۔حکام کے مطابق، لکڑیاں جمع کرنے والی کچھ گائوں کی خواتین نے تقریباً پانچ ملی ٹینٹوں کو دیکھا جنہوں نے نرسری کے وسیع علاقے میں پناہ لی تھی۔ایک سات سالہ بچی کو معمولی چوٹیں آئیں جب ایک گولی اس کے بازو کے قریب سے گزری۔ اسے مقامی ہسپتال منتقل کر دیا گیا۔ایک 48 سالہ دیہاتی انیتا دیوی نے بتایا کہ بھاری ہتھیاروں سے لیس ملی ٹینٹوں نے اس کے شوہر کو اس وقت پکڑ لیا جب وہ لکڑیاں جمع کرنے کے لیے نرسری میں تھے۔انیتا دیوی نے کہا، “ملی ٹینٹوں نے میرے شوہر کو بندوق کی نوک پر پکڑا اور مجھے قریب آنے کو کہا، لیکن میرے شوہر نے مجھے بھاگنے کا اشارہ کیا اور میں بھاگ گئی، ایک ملی ٹینٹ نے مجھے روکنے کی کوشش کی لیکن میں نے چیخنا شروع کر دیا، جس سے گھاس کاٹ رہے دو اور لوگوں کی توجہ مبذول ہو گئی،” ۔اس نے بتایا کہ یہ واقعہ اتوار کی شام 4.30 بجے کے قریب پیش آیا، اور وہ سب گھر واپس آئے اور پولیس کو اطلاع دی۔ انیتا دیوی نے بتایا کہ انہوں نے داڑھی اور کمانڈو کے کپڑے پہنے ہوئے تھے۔کٹھوعہ گزشتہ ایک سال کے دوران پاکستان میں مقیم دہشت گردوں کے لیے ادھم پور، ڈوڈہ اور کشتواڑ اضلاع کے اونچے علاقوں اور مزید کشمیر تک پہنچنے کے لیے دراندازی کے ایک بڑے راستے کے طور پر ابھرا ہے۔سرکاری اعداد و شمار کے مطابق 2024 میں ڈوڈہ، کٹھوعہ اور ریاسی اضلاع میں نو افراد، کشتواڑ میں پانچ، ادھم پور میں چار، جموں اور راجوری میں تین، تین اور پونچھ میں دو افراد مارے گئے تھے۔ ہلاک ہونے والوں میں 18 سیکورٹی اہلکار اور 13 ملی ٹینٹ شامل تھے۔