صداقت ملک
بھدرواہ، جو ماضی میں مہاراجہ امر سنگھ کی جاگیر کے طور پر مشہور تھا، ایک ایسا علاقہ ہے جس نے کئی نامور سکالرز، آئی اے ایس افسران، طبیب ، اعلیٰ آفیسران اور مختلف شعبہ ہائے زندگی کے افراد پیدا کئے ہیں۔ چھوٹا کشمیر کے نام سے مشہور یہ خطہ نہ صرف قومی سطح پر بلکہ عالمی سطح پر بھی اپنی منفرد شناخت رکھتا ہے۔ یہ علاقہ کئی نامور شخصیات کا مسکن رہا ہے جنہوں نے جموں و کشمیر اور ملک بھر میں نمایاں خدمات انجام دیں۔ انہی عظیم شخصیات میں ایک نام ڈاکٹر عبدالمجید بھدرواہی کا ہے جو اپنی مادر وطن بھدرواہ سے محبت کے باعث اپنے نام کے ساتھ ’بھدرواہی‘ لکھتے ہیں۔ڈاکٹر عبدالمجید بھدرواہی 3 مئی 1942 کو بھدرواہ کے تاریخی محلہ تھڑا میں پیدا ہوئے۔ ان کے والد خواجہ عبد الکریم اور والدہ مرسہ بیگم نے انہیں اخلاقی اقدار، مذہبی تعلیمات اور تعلیم کے فروغ کے ماحول میں پروان چڑھایا۔ ایک عام پس منظر سے ایک ممتاز معالج، نامور ادیب اور انسان دوست شخصیت بننے کا ان کا سفر لگن اور خدمت کی ایک متاثر کن کہانی ہے۔انہوں نے ابتدائی تعلیم پرائمری سکول مسجد محلہ بھدرواہ سے حاصل کی اور ثانوی تعلیم سری امر ہائی سکول بھدرواہ اور گورنمنٹ ڈگری کالج بھدرواہ میں مکمل کی۔ ان کی تعلیمی کامیابیوں نے انہیں پٹیالہ میڈیکل کالج سے ایم بی بی ایس کی ڈگری حاصل کرنے کی راہ دکھائی، جس نے ان کے طبیب کے مشغلے کی بنیاد رکھی۔
بحیثیت سرکاری ڈاکٹر انہوں نے جموں و کشمیر کے مختلف اضلاع میں مختلف عہدوں پر خدمات انجام دیں، جن میں چیف میڈیکل آفیسر، ایڈز کنٹرول کے اسسٹنٹ ڈائریکٹر اور ڈپٹی ڈائریکٹر ہیلتھ جموں شامل ہیں۔ ان کی پیشہ ورانہ زندگی مریضوں کی فلاح و بہبود اور عوامی صحت کے نظام کی بہتری کے لیے ان کی گہری وابستگی سے عبارت تھی۔ 2002 میں ریٹائرمنٹ کے بعد انہوں نے اردو ادب کی دنیا میں قدم رکھا اور ایک نئے دور کا آغاز کیا۔ریٹائرمنٹ کے بعد ڈاکٹر عبدالمجید نے اردو ادب میں نمایاں مقام حاصل کیا۔ ان کی تصانیف میں ’’انتخابِ نور‘‘، ’’مختصر طریقہ حج و عمرہ‘‘، ’’درود و سلام‘‘ اور دو حصوں پر مشتمل ’’دیارِ حبیب ‘‘شامل ہیں۔ ان کی تحریریں سادگی، روحانیت اور ادبی خوبصورتی کا امتزاج ہیں، جو قارئین کے لیے رہنمائی اور تحریک کا باعث بنتی ہیں۔
بحیثیت افسانہ نگار ڈاکٹر مجید نے انسانی جذبات، زندگی کی پیچیدگیوں اور سماجی مسائل کی عکاسی کرتے ہوئے بے مثال مہارت کا مظاہرہ کیا۔ ان کے مشہور افسانوں میں ’’جلتا گلاب‘‘، ’’تلاش‘‘، ’’ماں کا آنچل‘‘ اور ’’منی آرڈر‘‘ شامل ہیں۔ ان کی کہانیاں حقیقت پسندی، طنزاور لطیف مزاح سے مزین ہیں اور کچھ مصنفین کا ماننا ہے کہ انکی تحریریں سعادت حسن منٹو کی یاد دلاتی ہیں۔
ڈاکٹر مجید کی شخصیت شفقت، ہمدردی اور عاجزی سے بھرپور تھی۔ بحیثیت معالج، ان کا نرم مزاج اور ہمدردانہ رویہ بے شمار مریضوں کے لیے باعثِ سکون تھا۔ ان کی اہلیہ محترمہ حاجرا بیگم، جو محکمہ تعلیم میں لیکچرر تھیں، ان کی زندگی اور ادبی سفر میں اہم ستون ثابت ہوئیں۔ان کی کتاب’’چبھن‘‘ اور دیگر تصانیف زندگی کے احساسات، سماجی حقیقتوں اور انسانی جدوجہد کی بھرپور عکاسی کرتی ہیں۔ ان کی تحریریں قارئین کو سماجی انصاف اور اخلاقی اقدار کے موضوعات پر سوچنے پر مجبور کرتی ہیں۔2003 اور 2005 میں حج کی ادائیگی اور متعدد عمرہ سفر ان کی روحانی وابستگی کا اظہار ہیں جو ان کی تحریروں میں بھی نمایاں ہیں۔ بھدرواہی کی ادبی خدمات نہ صرف اردو ادب کا اہم اثاثہ ہیں بلکہ آئندہ نسلوں کے لیے مشعلِ راہ بھی ہیں۔ ان کی کہانیاں اور افسانے معاشرتی مسائل کو اجاگر کرنے اور ان کے حل کی کوششوں کے لیے ایک تحریک ہیں۔
(رابطہ۔7006432002)
