عظمیٰ نیوز سروس
راجوری//جموں و کشمیر بی جے پی کے سابق صدر اور پارٹی کے قومی ایگزیکٹیو کونسل کے رکن رویندر رینہ نے پولیس افسر کے خلاف تحقیقات کا مطالبہ کیا ہے جس نے قبائلی کمیونٹی کی ایک خواتین مظاہرہ کرنے والی کو تشویشناک طریقے سے مبینہ طورپر لات ماری تھی۔یہ واقعہ ضلع کلگام کے قاضی گنڈ میں پیش آیا، جہاں قبائلی کمیونٹی کے تین نوجوان لاپتہ ہو گئے تھے اور اب تک دو لاشیں برآمد ہو چکی ہیں۔قبائلی کمیونٹی نے اتوار کے روز اس واقعہ کے خلاف احتجاج کیا، اور مکمل تحقیقات کا مطالبہ کرتے ہوئے الزام لگایا کہ اس میں ایک گہری سازش چھپی ہوئی ہے۔سوشل میڈیا پر وائرل ہونے والے ایک ویڈیو میں ایک ڈپٹی ایس پی رینک کے پولیس افسر کو ایک خواتین مظاہرہ کرنے والی کو لات مارتے ہوئے دکھایا گیا ہے، جس پر عوامی غم و غصہ کی لہر دوڑ گئی ہے۔اتوار کو جموں و کشمیر کے کئی قانون سازوں نے اس معاملے کو جے اینڈ کے قانون ساز اسمبلی کے جاری بجٹ سیشن میں اٹھایا۔رویندر رینہ نے کہاکہ میں نے جموں و کشمیر پولیس کے ڈائریکٹر جنرل سے بات کی اور اس واقعہ کی تحقیقات کا مطالبہ کیا۔انہوں نے مزید کہا کہ قبائلی نوجوانوں کی گمشدگی اور موت ایک سنگین مسئلہ ہے جس پر پولیس بھی تحقیقات کر رہی ہے۔
