عظمیٰ ویب ڈیسک
سرینگر/خشک موسم کے بیچ محکمہ موسمیات نے وادی کشمیر میں اگلے 48 گھنٹوں کے دوران وسیع پیمانے پر ہلکے سے درمیانی درجے کے برف و باراں کی پیش گوئی ہے۔
متعلقہ محکمے کے ایک ترجمان نے بتایا کہ وادی میں اتوار کو موسم جزوی ابر آلود رہ سکتا ہے اور اس دوران شام کو کہیں کہیں ہلکی برف باری یا بارشیں ہوسکتی ہیں۔
انہوں نے کہا کہ وادی میں 3 مارچ کو بیشتر مقامات پر ہلکی سے درمیانی درجے کی برف باری یا بارشیں ہوستی ہیں اور اس دوران شمالی اور وسطی کمشیر کے پہاڑی علاقوں میں درمیانی سے بھاری برف باری متوقع ہے۔ان کا کہنا ہے کہ بعد ازاں 4 سے 9 مارچ تک موسم مجموعی طور پر خشک رہنے کا امکان ہے۔ موصوف ترجمان نے بتایا کہ وادی میں 10 سے 12 مارچ تک برف و باراں کا ایک اور مرحلہ متوقع ہے۔
محکمے نے اپنی ایڈوائزری میں سیاحوں، مسافروں اور ٹرانسپورٹروں سے کہا ہے کہ وہ ٹریفک ایڈوائزری پر عمل کریں جبکہ کسانوں سے کہا گیا ہے کہ وہ 4 مارچ تک اپنے کھیت کھلیانوں اور باغوں میں آبپاشی کرنے سے گریز کریں۔
ایڈوائزری میں کہا گیا ہے کہ اس دوران کہیں کہیں چٹانیں کھسک آنے کے بھی خطرات ہیں جس کے پیش نظر لوگوں سے کہا گیا ہے کہ وہ ان علاقوں میں جانے سے پرہیز کریں جہاں برفانی تودے آنے کے امکانات رہتے ہیں۔
دریں اثنا وادی کے بشیتر مقامات پر شبانہ درجہ حرارت معمول سے کم ریکارڈ ہوا ہے۔
گرمائی دارلحکومت سری نگر میں کم سے کم درجہ حرارت 2.3 ڈگری سینٹی گریڈ ریکارڈ کیا گیا جو معمول سے0.2 ڈگری سینٹی گریڈ کم ریکارڈ ہوا تھا۔ وادی کے شہرہ آفاق سیاحتی مقام گلمرگ میں کم سے کم درجہ حرارت منفی7.5 ڈگری سینٹی گریڈ ریکارڈ کیا گیا جو معمول سے 4.3 ڈگری سینٹی گریڈ کم ریکارڈ ہوا تھا۔
وادی کئے دوسرے مشہور سیاحتی مقام پہلگام میں کم سے کم درجہ حرارت منفی4.7 ڈگری سینٹی گریڈ ریکارڈ کیا گیا جو معمول سے2.7 ڈگری سینٹی گریڈ ریکارڈ ہوا تھا۔سرحدی ضلع کپوارہ میں کم سے کم درجہ حرارت منفی1.2 ڈگری سینٹی گریڈ ریکارڈ کیا گیا جو معمول سے2.2 ملی میٹر کم ریکارڈ ہوا تھا ـ
