عظمیٰ ویب ڈیسک
سرینگر/دہلی ہائی کورٹ نے این آئی اے کی عدالت کو ہدایت دی کہ وہ جیل میں قید جموں و کشمیر کے رکن پارلیمنٹ عبدالرشید شیخ عرف انجینئر رشید کی ملی ٹینٹ فنڈنگ کیس میں دائر ضمانت کی درخواست پر جلد فیصلہ کرے۔
جسٹس وکاس مہاجن نے کہا، پٹیالہ ہاؤس کورٹ کے ایڈیشنل سیشن جج-03 (ASJ-03) سے درخواست ہے کہ وہ درخواست گزار کی ضمانت کی درخواست کو جلد از جلد نمٹائے۔
عدالت انجینئر رشید کی اس درخواست پر سماعت کر رہی تھی، جس میں الزام لگایا گیا تھا کہ این آئی اے عدالت نے ان کی ضمانت کی درخواست پر کوئی فیصلہ نہیں دیا اور وہ رکن پارلیمنٹ بننے کے بعد قانونی طور پر غیر یقینی صورتحال کا شکار ہو گئے ہیں۔
جسٹس مہاجن نے مشاہدہ کیا کہ ہائی کورٹ نے انتظامی سطح پر پہلے ہی یہ وضاحت کر دی ہے کہ این آئی اے عدالت ہی اس معاملے کی سماعت جاری رکھے گی۔
