جموں و کشمیر میں پنچایت انتخابات کی تیاریاں، اسٹیٹ الیکشن کمیشن نے اقدامات شروع کر دیئے

عظمیٰ ویب ڈیسک
سرینگر/سات برس کے وقفے کے بعد، جموں و کشمیر میں رواں سال اپریل-مئی میں پنچایت انتخابات ہونے جا رہے ہیں، جو کہ جموں و کشمیر میں جمہوریت کی جڑوں کو مضبوط بنانے کی جانب ایک اہم پیش رفت ہے، ذرائع کا کہنا ہے۔ ان انتخابات کے لیے حتمی ووٹر لسٹ 20 جنوری کو شائع کی گئی تھی۔
انتخابات کے انعقاد کے لیے ایک اہم اقدام کے طور پر، یونین ٹیریٹری کے اسٹیٹ الیکشن کمیشن (ایس ای سی) نے ضروری انتخابی مواد کی خریداری شروع کر دی ہے۔ ایس ای سی تقریباً 40,000 ووٹنگ کمپارٹمنٹس اور 64 دیگر ضروری اشیاء حاصل کرنے کے عمل میں ہے۔ خریداری کے معاہدے کو حتمی شکل دینے کی آخری تاریخ 11 مارچ مقرر کی گئی ہے، اور سامان کی فراہمی ایک ماہ کے اندر مکمل ہونے کی توقع ہے۔
ایک سرکاری اہلکار نے بتایا کہ “جموں و کشمیر میں اس وقت مجموعی طور پر 38,800 پولنگ مراکز ہیں، جن میں 18,700 جموں صوبہ اور 20,100 کشمیر صوبہ میں واقع ہیں۔
جموں و کشمیر میں آخری پنچایت انتخابات 2018 میں ہوئے تھے اور پچھلی پنچایت باڈیز کی مدت 2023 میں مکمل ہو گئی تھی ـ
یہ انتخابات خاص طور پر اہمیت کے حامل ہیں کیونکہ یہ اگست 2019 میں دفعہ 370 کے خاتمے کے بعد ہونے والے پہلے پنچایت انتخابات ہوں گے