فارغ التحصیل ہونے والے نوجوان ملک کے مقدر کو سنواریں گے: لیفٹیننٹ گورنر

عظمیٰ ویب ڈیسک
سرینگر/لیفٹیننٹ گورنر منوج سنہا نے شری ماتا ویشنو دیوی یونیورسٹی کے جلسہ تقسیم اسناد سے خطاب کیا۔ لیفٹیننٹ گورنر نے نائب صدر جگدیپ دھنکھڑ کا شکریہ ادا کیا جنہوں نے یونیورسٹی کے دسویں جلسہ تقسیم اسناد میں فارغ التحصیل ہونے والے طلبہ کو حوصلہ افزائی کی۔ انہوں نے کہا کہ آج کا دن طلبہ کی یادوں میں ہمیشہ کے لیے نقش رہے گا۔ تقریب سے خطاب کرتے ہوئے، لیفٹیننٹ گورنر نے نوجوانوں پر زور دیا کہ وہ ملک کی ترقی کو آگے لے جائیں اور اسے دنیا کی سب سے بڑی معیشت بنائیں۔
انہوں نے کہا،ہمارے ملک کی طاقت اقدار، جدت طرازی اور علم سے طے ہوگی، اور مجھے یقین ہے کہ امرت کال میں فارغ التحصیل ہونے والے نوجوان ملک کے مقدر کو سنواریں گے۔ آج حقیقی دنیا میں قدم رکھنے والے طلبہ کے پاس ملک کی تعمیر میں اپنا کردار ادا کرنے کا ایک انوکھا موقع ہے۔
لیفٹیننٹ گورنر نے کہا کہ انسانیات، فنون، سائنس اور ٹیکنالوجی کے میدان میں ترقی نے نئی راہیں کھول دی ہیں اور فارغ التحصیل طلبہ کے علم اور سیکھنے کی صلاحیت انہیں کامیابی کی راہ پر گامزن کرے گی۔ انہوں نے مزید کہا، ہمارے نوجوان خصوصی علم اور مہارت سے لیس ہیں جنہیں دیہی علاقوں کی ترقی کے لیے مؤثر طریقے سے استعمال کیا جا سکتا ہے۔ اس مشن کے لیے لگن اور عزم ضروری ہے۔ سب سے بڑھ کر، ہمارے نوجوانوں کو اپنی قدیم ثقافت سے جڑا رہنا چاہیے اور اپنی صلاحیتوں اور روایتی دانش پر یقین رکھنا چاہیے۔
لیفٹیننٹ گورنر نے اس بات پر زور دیا کہ طلبہ کی مہارت اور علم کو عوام کی زندگی بہتر بنانے میں کام آنا چاہیے۔انہوں نے مزید کہا کہ سائنس اور ٹیکنالوجی کے شعبے میں مستقبل کے مواقع حاصل کرنے کے لیے، ہمیں اپنے تدریسی و تربیتی نظام پر نئے سرے سے غور کرنا ہوگا کیونکہ اس کا براہ راست اثر ’’وِکست بھارت‘‘ کے سفر پر پڑے گا۔
لیفٹیننٹ گورنر نے تعلیمی برادری پر زور دیا کہ وہ طلبہ کی صلاحیتوں کو نکھارنے پر توجہ مرکوز کریں اور تعلیمی اداروں کو ایک خوشحال بھارت کی تعمیر کے لیے سب سے مؤثر ذریعہ بنائیں۔ یہ ہمارے اساتذہ اور تعلیمی اداروں کی ذمہ داری ہے کہ وہ جدید تعلیمی پروگرام شروع کریں، تجسس کو پروان چڑھائیں، تنقیدی سوچ، تخلیقی صلاحیتوں اور جدت کو فروغ دیں۔ اساتذہ کو چاہیے کہ وہ اپنے ذاتی تجربات طلبہ کے ساتھ شیئر کریں تاکہ انہیں عمر بھر سیکھنے کی مہارتوں کے لیے متاثر کیا جا سکے، جو ان کے مستقبل کی تشکیل میں مدد دے گی۔لیفٹیننٹ گورنر نے تمام فارغ التحصیل طلبہ کو روشن مستقبل کے لیے نیک خواہشات پیش کیں۔ انہوں نے طالبات کو لڑکوں سے بہتر کارکردگی دکھانے پر مبارکباد دی اور انہیں میڈل ٹیلی، سرٹیفکیٹ آف ڈسٹنکشن اور انفوسس فاؤنڈیشن پرائز میں سبقت حاصل کرنے پر سراہا۔