عاصف بٹ
کشتواڑ//ضلع ترقیاتی کمشنر کشتواڑ نے ضلع کے اندر آئے روز ہورہے احتجاج کو روکنے کیلئے پانچ سے زائد افراد کی ایک ساتھ جمع ہونے پرپابندی عاید کردی ۔ ضلع انتظامیہ کی جانب سے جاری کردہ حکمنامے میںلکھا گیاہے کہ یہ دیکھا گیا ہے کہ کچھ لوگ مظاہرے کے بہانے اجتماعات کو اپنی طرف متوجہ کرنے کی کوشش کر رہے ہیں اور ان غیر مجاز اسمبلیوں کے جمع ہونے سے کسی بھی ناخوشگوار واقعے کے رونما ہونے کا معقول خدشہ ہے جو عوامی خلفشار میں اضافہ کر سکتا ہے اور عوامی امن و تحفظ کے لیے خطرہ ہے۔ حکم نامہ کے مطابق یہ غیر قانونی اجتماعات مین چوک، سڑکوں پر بغیر کسی حفاظتی انتظامات کے کیے جاتے ہیں اور یہ مسافروں، راہگیروںکے لیے پریشانی اورکاوٹوں کا باعث بنتے ہیں اور اس سے امن و امان کی موجودہ صورتحال کے ساتھ ساتھ آنے والے مذہبی تہواروں جیسے مہاشیو راتری، رمضان المبارک و عیدالفطر کو مدنظر رکھتے ہوئے عوامی انتشار یا عوامی امن و سکون کو خطرے میں ڈالنے والے خطرات کو روکنے کے لیے احتیاطی تدابیر اختیار کرنے کی فوری ضرورت ہے۔حکم نامہ میںکہاگیا ہے’’ اسلئے بی این ایس ایس کی دفعہ 163کے تحت حاصل اختیارات کا استعمال کرتے ہوئے میں راجیش کمار شاون، ڈسٹرکٹ مجسٹریٹ کشتواڑپانچ یا پانچ سے زیادہ لوگوں کے کسی بھی غیر مجاز اجتماع کو کشتواڑ شہر و اس سے ملحقہ علاقوں میں عوامی مقامات پر احتجاج یا دھرنے منعقد کرنے پر مکمل پابندی عائد کرنے کا حکم دیتا ہے‘‘۔ ایس ایس پی کشتواڑ اس حکم کو صحیح معنوں میں نافذ کرنے کی ہدایت کی گئی ہے اورخلاف ورزی کرنے والوں کے خلاف بھارتیہ نیا سنہتا 2023کی دفعہ 223کے تحت مقدمہ درج کرنے کو کہاگیاہے۔
